21 мая 2012 г.
Сивĕ шыва кĕресси пирĕн çĕр-шывра тĕп уявсенчен пĕринпе - Кăшарнипе çыхăннă. Библие ĕненес тĕк, шыва кĕртекен Иоанн Иордан юхан шывне тасатнă. Иисуса шыва кĕртсен çак шĕвек сиплĕ пулса тăнă, çылăхсенчен хăтарма пултарнă. Кăшарнире çынсем сиплĕ шыва тĕрлĕ савăта тултарса килĕсене илсе кайнă. Хăюллăраххисем вакка чăмса тухнă. 1886 çулта сивĕ шыв усă кỹни пирки медицинăра та çырса кăтартнă. Шăпах çак çул Бавари священникĕн Себастьян Кнейпăн "Эпĕ шывпа сипленни" кĕнеки тухнă. Автор сывлав çулĕсен чирĕсемпе аптранă иккен, вĕсенчен шăпах çак мелпе хăтăлнă. Кнейп çапла пĕтĕмлетнĕ: сывлăм, юр, йĕпе чул тăрăх çỹресе, сивĕ шыва кĕрсе чылай чире (гипертонирен пуçласа пуç ыратни таранччен) ирттерме пулать. Пиртен чылайăшĕ сивĕрен шикленет. Çав хушăрах çакна палăртнă: сивĕ шывпа сипленни шăнса пăсăлнипе çыхăннă чирсемпе аптрас хăрушлăха 25 хут чакарать. Хăшĕсем, паллах, ку тĕслĕхре пачах хирĕçле пулмалла тесе шухăшлаççĕ. Çын сивĕ шыва кĕрсен унăн пỹре çи парĕ (надпочечник) гормонĕ _ адреналин _ хушăнать. Адреналин ыратнине ирттерет, чĕре таппине хăвăртлатать, шалти органсем тата пуç мими патне юн пырассине лайăхлатать, иммун тытăмне çирĕплетет. Чылай "морж" вакра темиçе минут çеç пулать, çавна май шăнмасть. Вĕсем стрессене çăмăлрах чăтса ирттереççĕ. Сивĕ шыв усăллă пулнине ĕненсен çеç çын çак процедурăран киленỹ илет. Кĕлеткине çак мелпе пиçĕхтернисем йывăрлăхсенчен те хăрамаççĕ, кăмăлĕ лайăхран вĕсем пурнăçпа та кăмăллă. Анчах сивĕ шывпа ытлашши иртĕхни организма сиен кỹме пултарать. Хăш-пĕр тухтăр çын çак "ĕçпе" аппаланма вуçех пăрахсан унăн депресси, кăмăл сỹрĕклĕхĕ пулать тесе шухăшлать. Хăшĕсем ачасене сивĕ шывпа туслаштармалла мар тесе палăртаççĕ. Сивве пула аллерги пуçланакансен, туберкулезпа, гинекологи тата пỹре чирĕсемпе асапланакансен кĕлеткине ку мелпе пиçĕхтермелле мар. Сивĕ шывпа туслашиччен тухтăрпа канашласан аван.
Источник: "Елчĕк Ен"