08 февраля 2007 г.
ТУШКИЛ. Пирĕншĕн шкул – иккĕмĕш кил. Кил те тĕрлĕрен пулать, шкул та çавах пулĕ. Пĕринче ача хăйне читлĕхри пек туять. Тепринче вара хăй мĕн пултарнине пĕтĕмпех кăтартма, малалла аталанма майсем çителĕклĕ, яланах çĕннине пĕлес килет. Тушкилти пĕтĕмĕшле вăтам пĕлÿ паракан шкул пирĕншĕн чăннипех пĕлÿ çурчĕ шутланать.
Шкула 1882 çулта уçнă. Халĕ эпир вĕренекен çурт 1974 çулта хута кайнă. 312 ача вĕренет унта, 22 ялпа хуларан çÿреççĕ пĕлÿ илме пирĕн яла.
Мĕнпе паллă-ха 1997–2007 çулсем пирĕн шкулшăн( Чи малтанах 1997 çулта пĕлÿ çуртне “сенкер çулăм” ырлăхĕ çитнине асăнмалла. Тепĕр çулне “Чи лайăх шкул” конкурсра çĕнтерчĕ. 1999 çулта Тушкил шкулĕнче лицей уçăлчĕ. Занятисене Чăваш патшалăх университечĕн преподавателĕсем вырăна килсе ирттереççĕ. Пирĕн шкул – республикăри “Чи лайăх хушма хуçалăх” конкурс лауреачĕ "2001 ç.", “2002 çулхи чи лайăх шкул” конкурсра “Шкул – ял управçи” номинаци çĕнтерÿçи.
Шкул автобусĕпе кунсерен 56 вĕренекен пĕлÿ илме вас-кать. Ачасен шучĕ çулсерен ÿссе пырать. Иртнĕ çул “Вĕрентÿ” приоритетлă наци проектĕнче çĕнтерсе, 1 миллион тенкĕлĕх гранта тивĕçлĕ пулчĕ. Ку çитĕнÿ, паллах, учи-тельсен коллективĕпе вĕренекенсем пĕрле вăй хунипе пулнă. Ахальтен мар вĕрентекенсем йышĕнче патшалăх наградисене тивĕçнисем пур: РСФСР тава тивĕçлĕ учителĕ "В.Е.Ефимов", ЧР тава тивĕçлĕ учителĕсем "С.П.Орлова, Н.Ф.Давыдов", халăха вĕрентес ĕç отличникĕсем "В.Е.Ефимов, С.П.Орлова", пĕтĕмĕшле вĕрентĕвĕн хисеплĕ ĕçченĕсем "В.А.Егоров, В.М.Орлов, З.В.Кириллова".
Педагогсем çĕнĕ программăсене, информаци технологийĕсене ĕçе кĕртессине, вĕрентĕве çĕнĕлле, пахалăх тĕлĕшĕнчен çÿллĕ шайра йĕркелессине тĕпе хурса тăрăшаççĕ. Вĕренекенсем çулленех тĕрлĕ олимпиадăсенче малти вырăнсене йышăнаççĕ. Ку вĕренÿ çулĕнче 10-11 классем – 21, тăххăрмĕшсем – 3, тăваттăмĕшсем 2 хутчен малти вы-рăнсене çĕнсе илнĕ. Акă матуррисен хушамачĕсем: М.Охотников, А.Андреев, А.Васильев, В.Кондратьев, А.Данилова "икшер предметпа", Т.Сорокина, Е.Павлов, Э.Антонова, А.Петров, Е.Раймова, Н.Степанова, М.Куроп, И. Трофимова, А.Ильин, К.Моряков, О.Сорокина, Е.Данилова, М.Емельянов, Д.Петухов, О.Сергеева, Е.Сергеева. Ирина Трофимова пĕлтĕр хими олимпиадинче республикăра иккĕмĕш вырăна тухрĕ. Ку ÿсĕмре З.В.Кириллова вĕрентекенĕн тÿпи те пур. Вăл РФ Президенчĕн премине илмелли конкурс витĕр ăнăçлă тухса çĕнтерÿçĕсен йышне кĕчĕ.
Пуçламăш классен учителĕн Е.И.Петрован ĕçне “Вĕрентÿ учрежденийĕсенчи воспитани ĕçне çĕнетме пулăшакан чи лайăх проект” номинацире иккĕмĕш вырăнпа хакларĕç вĕрентÿ пайĕнче. “Районти чи лайăх класс ертÿçи” конкурсра мала тухса, вăл зонăра иртекен ăмăртусене хутшăнма тивĕç пулчĕ.
Кружоксемпе элективлă курссем ĕçлени те вĕренес кăмăлтуйăма çĕклет. Çулсеренех вуншар ача тракторист правине алла илет. Ку вăл çак специальноçпа профессиллĕ вĕренÿ йĕркеленипе çыхăннă. Кунсăр пуçне 10–11 классенче икĕ енлĕ профильлĕ вĕренÿ пырать: çут çанталăк çинчен вĕрентекен наукăсемпе математика тата гуманита-ри енĕпе. Пуçламăш классенченех информатика тата ют чĕлхене вĕренеççĕ.
Вунă çул хушшинче шкултан 375 ача вĕренсе тухнă, вĕсенчен 235-шĕ ЧПУ студенчĕсем пулса тăнă. Шкула ылтăн тата кĕмĕл медальсемпе пĕтернисем вăтăрăн.
Эпир шкул çитĕнĕвĕсемпе савăнатпăр, унăн ятне çÿлерех çĕклеме тăрăшатпăр.
Источник: "Ял ĕçченĕ"