10 августа 2016 г.
Иллен кунĕнче Тушкилти Любовь Семеновна Иванована 90 çул тултарнă ятпа саламлама таçтан та хăна-вĕрле пуçтарăнчĕ. Малтанах ял тăрăхĕн пуçлăхĕ Петр Захаров, вырăнти ветерансен канашĕн председателĕ Таисия Петрова çитрĕç хăтлă кил-çурта. Нумай ăшă сăмах каларĕç ятлă-сумлă юбиляр ячĕпе, çирĕп сывлăх, ырă та лăпкă кунсем сунчĕç, асăнмалăх парне пачĕç. Кинемишĕн кĕтмен самант вара Раççей Президенчĕн Тав çырăвне илни пулчĕ.
Любовь Семеновна хĕрĕн Зинаида Владимировнан çемйипе пурăнать. Хăйне канлĕ туять, çывăх çынсен юратăвĕ вăй-хал парать. Ытти ачисемпе мăнукĕсем те килсех тăраççĕ. Кĕтмен хăнасем те пулаççĕ тепĕр чухне. Вĕсем ятарласа хăйне тав тума килнине пĕлсен савăнăç куççулĕ те тухать. 43 çул сывлăх сыхлавĕнче тăрăшнă вăл. Акушеркăра ĕçлесе миçе пепкене кун çути паман-ши, ашшĕ-амăшне телей парнелемен-ши? Вăл ĕçленĕ çулсенче çемьере 5-6 е ытларах та ача ỹснĕ. Халĕ районта тепĕр чухне уйăхра 11 ача çуралать. Л.Иванова пĕр кунта 12 хĕрарăма ача çураттарнине аса илчĕ. Нумайăшĕ çут тĕнчене килнĕ чиперукĕсене ăна хисепленипе Люба ят панă.
Зинаида Владимировна Тушкил шкулĕнче географи учителĕнче ĕçлесе тивĕçлĕ канăва тухнă. Унпа амăшĕн юбилейĕ хыççăн калаçма тỹр килчĕ.
-Чăннипех те мухтава тивĕçлĕ тата пархатарлă пурнăç çулĕ утса тухнă пирĕн анне,- терĕ вăл калаçу çăмхине сỹтсе.
Вăрçă вăхăтĕнче иртнĕ Тушкил хĕрĕн çамрăклăхĕ. Темле йывăр пулсан та, палăртнă тĕллевĕнчен, медсестра пулас ĕмĕтрен каялла чакман. 1943 çулта медицина училищине "пиллĕк" паллăсемпе пĕтернĕ. Кăштах Тăвай больницинче ĕçленĕ хыççăн хăйсен ялĕнчи больницăна вырнаçнă. 1945 çулхи çурла уйăхĕнче Тушкил каччипе, Владимир Иванович фронтовикпа мăшăрланнă, 5 ача пăхса ỹстернĕ. Паян вĕсенчен тăваттăшĕ пурăнаççĕ. Упăшки 87 çулта çĕре кĕнĕ.
Люба аппа 90 çула çитсе хастарлăхне, хĕр чухнехи сăн-сăпатне çухатман-ха. Вулама куçĕ курать. Типтерлĕхе юратать. "Ял ĕçченĕ" хаçата чи малтан алла тытать. "Сывлăх", "Хушма хуçалăх", "Аргументы и факты" хаçатсене вулать.
Чуна килекен юрă илтсен: "Ташласа та парап, ак,- тесе шỹтлекен ватă пурнăç илемĕпе киленсе ĕмĕрне тăсать.
Р.ШУМОВА.
Сăн ỹкерчĕкре: Любовь Семеновна Иванова юбилей кунĕнче чи çывăх çыннисем хушшинче.
Источник: "Ял ĕçченĕ"