Публикации » "АККОНД" пулас специалистсем хатĕрлемелли программăна тĕпе хурса ĕçлет

01 апреля 2016 г.

Пуш уйăхĕн 22-мĕшĕнче Тăвай районĕнчи "Тушкилти пĕтĕмĕшле пĕлỹ паракан вăтам шкул" муниципаллă бюджетлă вĕренỹ учрежденийĕнчи 30 вĕренекене "АККОНД" кондитер фабрикин производство цехĕсене кăтартса çỹренĕ, çакă вĕсемшĕн пĕтĕмĕшле экскурси кăна мар, пурнăçпа, производствăпа тỹрремĕнех паллашмалли вырăн та пулса тăнă. Вĕренекенсем çакăн пек пысăк та ăнăçлă ĕçлекен предприятире пуçласа пулса курнă.

Экскурси хăрушсăрлăх техникипе тата производствăра харпăр хăйне тытмалли правилăсемпе инструктаж илнинчен пуçланнă, çакăнпа пĕрлех фабрика сотрудникĕсем çамрăк хăнасене "АККОНД" компанин предприятийĕсен ĕçĕ-хĕлĕ çинчен кĕске фильм кăтартнă.

Шкул ачисем ятарлă накидка тата калпаксем тăхăннă хыççăн вĕсене производство цехне илсе кĕнĕ, унта çамрăксем пурте юратакан тата пĕлекен десертсемпе канфетсене мĕнле туса кăларнине хăйсен куçĕпе курнă кăна мар, пылак продукцие конвейер çинченех тутанма та пултарнă. Фабрика специалисчĕсем вĕренекенсене производство технологийĕсемпе, ку чухнехи чи çĕнĕ оборудовани ĕçĕпе паллаштарнă. Кунта пĕтĕм оборудовани çĕнĕ тата производствăна туллин автоматизациленĕ.

Экскурси хыççăн ачасене чейпе тата пылак çимĕçсемпе сăйланă, тĕрлĕ пылак çимĕçсене дегустаци тума май панă. Çамрăксемпе "АККОНД" АО генеральнăй директорĕ Валерий Иванов хăй те курнăçма кăмăл тунă. Вăл яшсемпе хĕрсене предприяти историйĕ, хăйĕн инженер-электрикрен пуçласа пĕтĕмĕшле холдингăн генеральнăй директорĕ таран ỹсме май панă професси çул-йĕрĕ çинчен каласа кăтартнă. "Нимĕн те хăй тĕллĕн, тăрăшмасăр пулмасть, - палăртнă гендиректор, - çитĕнỹ тăвас тесен, çине тăрса ĕçлемелле, хăвăра вĕçĕм аталантармалла! Технологисем кашни çеккунтра çĕнелсе пыраççĕ, вĕсемпе пĕрлех - пирĕн фабрика та. Эпир паянах хамăрăн ăста та пысăк пĕлỹллĕ пулас кадрсем пирки шухăшлатпăр, пирĕншĕн эсир пулас специалистсем, сирĕншĕн лайăх та кал-кал, тикĕс ĕçлекен производствăпа паллашни пысăк пĕлтерĕшлĕ. Тата, паллах, аслă вĕренỹ заведенийĕ пĕтернĕ хыççăн эпир сире хамăрăн туслă коллективра кĕтетпĕр".

И.ИВАНОВ.