31 марта 2015 г.
Чăваш наци конгресĕн районти уйрăмĕн членĕсем ятарласа Шупашкара çитсе килчĕç. Унта вĕсем ЧНК президенчĕн çумĕсемпе - В.Л.Клементьевпа, П.В.Ивантаевпа, А.П.Леонтьевпа, Э.К.Бахмисовпа тĕл пулса пĕр-пĕрне хумхантаракан ыйтусене сỹтсе яврĕç.
ЧНК президенчĕн пĕрремĕш çумĕ В.Клементьев тăвайсене хастар пулнишĕн тав турĕ, çывăх вăхăтра туса ирттермелли ĕçсем çинчен каласа кăтартрĕ.
Конгресăн Тăвай районĕн ертỹçи Анатолий Кириллов ĕç планĕпе паллаштарчĕ, вырăнта мĕнлерех ĕçленине пĕлтерчĕ. Тĕлпулу вăхăтĕнче кашниех хăйне мĕн пăшăрхантарнине каларĕ, тĕрлĕ сĕнỹ-канаш та чылай пулчĕ. Çĕнĕ Пуянкассинчи вăтам шкулта чăваш чĕлхине вĕрентекен Э.Н.Кириллова ача сачĕсенче шăпăрлансене çине тăрсах вырăсла вĕрентнине сивлерĕ. Конгресăн информаци комитечĕн ертỹçине А.П.Леонтьева та тăван чĕлхене çителĕклĕ тимлĕх уйăрманни пăшăрхантарать. Чăваш ялĕсенче ачасемпе вырăсла калаçма тăрăшни, тĕрлĕ мероприятисене чăвашла ирттерменни тăван чĕлхене пăрахăçласси патне илсе çитерме пултарнине пĕлтерчĕ вăл. Ял уявĕсене еплерех ирттересси, масарсене тирпейлесе йĕрке тăвасси çинчен те сăмах пулчĕ икĕ сехете яхăн пынă калаçу вăхăтĕнче. Пуриншĕн те усăллă пулчĕ вăл. Чăвашлăха упрас ыйту çивĕчленсех пынине, ăна татса парасси хамăртан та питĕ нумай килнине ăнланса илчĕ пулĕ кашниех.
Ĕçлĕ çул çỹревĕн культура программи те пуян пулчĕ.
Малтанах тăвайсем ỹнер музейне çул тытрĕç. Кунта вĕсене унăн директорĕ Г.В.Козлов ăшшăн кĕтсе илчĕ. Геннадий Васильевич паллă художник, пирĕн ентеш, Вăрманхĕрринчен. Нумаях пулмасть Тăвайри халăх музейĕнче унăн картинисен выставки уçăлнăччĕ. Çак пысăк пĕлтерĕшлĕ пулăмшăн паллă ентешĕмĕре район администрацийĕн Тав çырăвне парса чысларĕ А.Кириллов. Ỹнер музейĕ - тĕп хулари чи пысăк культурăпа искусство учрежденийĕ. Унăн залĕсенче чăваш, вырăс, ют çĕршыв художникĕсен çĕр-çĕр картинипе паллашма пулать.
Тăвайсемшĕн уйрăмах мухтавлă ентешĕсен - Н.К.Сверчков, М.С.Спиридонов, С.Кадикин картинисемпе паллашма кăмăллă пулчĕ. Хальхи паллă ỹнерçĕн Анатолий Даниловăн выставки те кăсăклантарчĕ. Каçхине вара ЧНК хастарĕсем Чăваш академи драма театрĕнче çĕнĕ спектакльпе паллашрĕç. Çак каç сцена çинче премьера - "Вĕри юнлă çемçе чун" пулчĕ. Мухтавлă поэтăмăр, Константин Иванов çинчен И.С. Максимов-Кошкинский пьеси тăрăх лартнă ăна. Куракансем спектакле хапăлласа йышăнчĕç. Хăйсен ентешĕсене - СССР халăх артисткине В.К.Кузьминана тата Чăваш халăх артистне С.Иванова сцена çинче курни те пирĕн кăмăла çĕклерĕ.
Çак кун Тăвай енри чăвашлăхшăн ĕçлекенсемшĕн чăннипех усăллă та интереслĕ пулчĕ.
П.НИКИФОРОВ. Ураскасси ялĕ.
Источник: "Ял ĕçченĕ"