04 сентября 2009 г.
Тушкиле И.Н.Ульянов ячĕллĕ Чăваш Патшалăх университечĕн ректорĕ Л.П.Кураков килсе кайрĕ. Шăп çав кун ăна “Тушкил поселенийĕн хисеплĕ çынни” ята илнине ĕнентерекен свидетельство, орден пачĕç. Çак паллă тĕл пулу ялти культура керменĕнче иртрĕ. Лев Пантелеймоновича ЧПУ студенчĕ А.Борисов тата Тушкил шкулĕнче вĕренекен Т.Захарова çăкăр-тăварпа, сăрапа кĕтсе илчĕç.
Е.И.Петрова ертсе пыракан чи малтанах ял поселенийĕн пуçлăхне П.И.Захарова сăмах пачĕ. Ун хыççăн вара сцена çине Тушкилти лицей директорĕ С.П.Орлова тухрĕ. Кăçалхи çул вĕсемшĕн паллă пулнине палăртрĕ вăл. Тушкил шкулĕ уçăлнăранпа – 115 çул (çĕнĕ шкула 35 çул), университетпа тачă çыхăнса ĕçлеме пуçланăранпа 10 çул çитнĕ. Çак тапхăрта университетран 335 ача тÿлевсĕр вĕренсе тухнă, вĕсенчен 159-шĕ ĕçлеççĕ. Светлана Павловна университет, Л.П.Кураков ректор ял çыннисемшĕн, ачасемшĕн нумай тăрăшнине пĕлтерчĕ, тĕслĕхсем илсе пачĕ. Университетăн культура керменне харăсах 900 çын вырнаçма пултарать, спорт комплексĕнче вара республика шайĕнчи ăмăртусем иртеççĕ. Кунсăр пуçне студентсемпе преподавательсем профилакторинче сипленме пултарнине, сывлăх центрĕнче хăйсен сывлăхне тĕрĕслеттерме май пуррине пĕлтерчĕ. Кунта пĕтĕмпех Л.П.Кураков ректор тÿпи те пысăк пулнине палăртрĕ. Лев Пантелеймоновича ырлăх-сывлăх тата пысăкрах çитĕнÿсем тума, пурнăç çулĕпе çирĕппĕн утма сунса вĕçлерĕ вăл калаçăвне. Ял поселенийĕн пуçлăхĕн çумĕ И.Филиппова сумлă хăнана, вĕренсе тухнисен ячĕпе саламласа, турăш пачĕ. Медицина факультетĕнче вĕренекен Ольгăпа Татьяна Сорокинасем чечек çыххи парнелерĕç. Ашшĕ-амăшĕсен ячĕпе П.Н.Борисов “Выхожу один я на дорогу...” юрă парнелерĕ. Пĕр инструментсăр юрласа пани пухăннă çынсене кăна мар, Л.П.Кураковăн кăмăлне те кайрĕ, Мускав артисчĕсенчен те лайăхрах юрланине палăртрĕ.
Лев Пантелеймонович Кураков сăмах илчĕ çакăн хыççăн. Патăрьел районĕнчи Ишек ялĕнче çуралса ÿснĕ вăл. 40 çул ытла университетра ĕçлет, вĕсенчен 20-шне ректор пулса. Чи малтанах унăн ассистенчĕ, кайран профессорĕ пулнă. Вăл – нумай кĕнеке, справочник, ĕç авторĕ, Европăри ректорсен клубĕн членĕ, тĕнчери Вена университечĕн хисеплĕ профессорĕ, ЧР ректорсен канашĕн председателĕ. Темиçе çул хушши “Çулталăк ректорĕ”, “Çулталăк ертÿçи” ятсене тытса пырать. Шупашкар, Канаш, Етĕрне, Патăрьел тăрăхĕсен, кăçалхи 28-мĕш августран вара Тушкил ял поселенийĕн хисеплĕ çынни шутланать.
Чи малтанах ректор хăйне лайăх кĕтсе илнĕшĕн тав турĕ, ял ĕçченĕсене юратнине палăртрĕ. “Кам ял ĕçченне юратмасть, çав тăван килне, ашшĕ-амăшне те савмасть. Юратма та пĕлмест вăл, – терĕ. –Эпĕ университетра ĕçлеме пуçласанах вĕренекенсенчен 19 проценчĕ кăна ялтанччĕ, халĕ вара – 54 процент”.
Тушкилти лицей ĕçне лайăх енĕпе палăртрĕ ректор, çакна С.П.Орлован тăрăшулăхĕпе çыхăнтарчĕ. Нумаях пулмасть Лев Пантелеймоновича IV степень “Тăван çĕршыв умĕнчи тава тивĕçлĕ ĕçсемшĕн” орденпа наградăланă. “Ку награда ман кăна мар, пурин те. Салатма май пулнă пулсан, кашнинех парса тухаттăм”, – хăйĕн шухăшне пĕлтерчĕ хăна. Ăса хаклă пуянлăхпа танлаштарчĕ. Ăслă çыншăн, университетшăн кризис пулмассине асăнчĕ. “Эпĕ халĕ Тушкилĕн хисеплĕ çынни. Татса паман ыйтусене пăхса тухăпăр малашне, яланах пулăшса тăрăпăр сире”, – тесе вĕçлерĕ калаçăвне Л.П.Кураков.
Тĕл пулу А.Уляндина юрăç тата ÿнер факультечĕн студенчĕсем йĕркеленĕ концертпа вĕçленчĕ.