25 октября 2019 г.
Онлайн мелĕпе сасăласа Пĕтĕм Раççейри конкурсăн регион тапхăрĕн çĕнтерÿçине палăртнă. Вăл - Тăвай районĕнчи Николай Шамбулин.
Конкурс кăçалхипе тăххăрмĕш хут иртет. Регион тапхăрĕн тупăшăвне 20 полици ĕçченĕ хутшăннă. Сасăлав ЧР Шалти ĕçсен министерствин (ШĔМ) сайтĕнче октябрĕн 7-16-мĕшĕсенче иртнĕ. Районти полици уйрăмĕн участокри уполномоченнăйĕ Н.Шамбулин чи нумай сасă пухса çĕнтерÿçĕ пулса тăнă. Полици капитанĕ Шалти ĕçсен органĕсен службинче 14 çул, вĕсенчен 10 çулне - участковăй должноçĕнче. Ăна шаннă 6 ял территоринче 4200 яхăн çын пурăнать, вĕсене йĕркелĕхпе тивĕçтерес тесе тăрăшать. Пушă вăхăтне ытларах çемйипе - мăшăрĕпе Иннăпа, 3 çулхи ывăлĕпе Димитрийпе ирттерет. Чун киленĕçĕ вара - пулла çуресси.
Чăваш Енри «халăх участковăйĕ» Пĕтĕм Раççейри конкурс финалне хутшăнать. Сасăлав 2019 çулхи ноябрь уйăхĕн пуçламăшĕн-че професси уявĕ умĕн (ноябрĕн 17-мĕшĕнче полицин участокри опер-уполномоченнăйĕн кунĕ) иртет.