09 июня 2015 г.
Çěртме уйăхěн пуçламăшěнче Чутейри вăтам шкул çумěнче «Кулă» лагерь ěçлеме пуçларě. Лагерь пуçлăхě Л.Титова, В.Куприяновапа А.Сорокина воспитательсем, хăрушсăрлăх енěпе ěçлекен И.Васильев, спорт сехечěсене ертсе пыракан В.Шамбулин, Л.Белова, Л.Антонова поварсем тăрăшаççě кунта.
Лагерь Чăваш гимнě янăранипе уçăлчě. Чăваш Республикин ялавě вěлкěшме пуçларě. Воспитательсем лагерьти кун йěркипе паллаштарчěç. Ун хыççăн хаваслă уяв пуçланчě. Ачасем патне хăнана Ашапатман карчăк /В.Куприянова/, Кикимора /В.Кротова/, Карлсон /А.Чайкин/, Йěрекен принцесса /К.Мясникова/, Асамçă /А.Кабартова/ килсе çитрěç. Юмахри сăнарсем тěрлě вăйăсем выляттарчěç. Спорт ăмăртăвěсенче маттур пулнă С.Юркин ылтăн медаль çěнсе илчě. Вăйăсем хыççăн пухăннисем клуб заведующиě йěркеленипе концерт курчěç. Уйрăмах В.Куприянова, Н.Тимофеева синтезаторпа вылянă кěвěсене шухăша кайса итлерěç вěсем.
Уява шкул çулне çитмен ачасемпе вěсен ашшě-амăшěсем те килнě. Асамçă кашни шăпăрланах пылак çимěçпе сăйларě.
З.Иванова. Чутей ялě.