03 июня 2014 г.
Чутейри Васильевсен çемйи- ял-йышра хисеплисенчен пĕри. Вулавăшра библиотекарьте ĕçлекенЕлена Ивановна мăшăрĕпе Олег Егоровичпа икĕ ача пăхса ÿстернĕ. Ывăлĕ Володя ял хуçалăх академийĕ , хĕрĕ Таня филологи факультечĕ пĕтернĕ. Вĕсем çемьеленсе Шупашкар хулинче пурăнаççĕ.
Малаллахи сăмахăм Олег Егорович çинчен пулĕ. Вăл1952-мĕш çулхи январĕн 30-мĕшĕнче Чутей ялĕнче çуралнă.Мускав облаçĕнче хĕсметре тăнă, водитель пулнă. Унтан таврăнсан ял Советĕнче счетовод –кассирта, каярахпа «Кубнинский» совхоза шофера ĕçе вырнаçнă. Ăста водителе инçетри рейссене кайма шаннă. Шăрăх çулсенче выльăхĕсем вали Курган,Свердловск, Винница облаçĕсенчен улăм турттарма та хутшаннă. Хуçалăх салансан пушар хуралне ĕçлеме куçнă. 42 çул руль умĕнче ĕçлесе тивĕçлĕ канăва тухнă Пенсие кайсан та ялти пушар машинине юсаса йĕркере тытса тăрать.
Нумаях пулмасть манăн ОлегЕгоровичран пулăшу ыйтма тиврĕ. Чĕркуççи шăмми вырăнтан куçрĕ, малалла пĕрутăм та тăваймастăп. Ялти ытти çынсемпекех Зоя аппа патне каяканччĕ ун пек чухне. Çав кун шăпах ялта пулмарĕ, ачисем патне Шупашкара кайнă, терĕç.Эпĕ Олег Васильев сикнĕ шăмăсене лартать тенине илтнĕччĕ. Шăнкăравларăм вĕсем патне. Нумай кĕттермерĕ, чупса та çитрĕ. Урана утакан турĕ. Питĕ пысăк тав ăна. Кăсăклантăм: хăçан, епле майпа вĕреннĕ çак ĕçе? Малтанах хуняшшĕн сикнĕ хул шăммине вырăна лартнă иккен.Тепĕр чухне çамрăксем те ăмăртусем хыççăн пÿрне шăммисене ларттарма пыркаласçĕ. Ытти ялсенчен килекенсем те пур. Вăл пурне те пулăшма тăрăшать.
З.Иванова.
Чутейялĕ.