10 января 2014 г.
Чутей ялĕнче пысăк спорт уявĕ пулчĕ.Сочире хĕллехи олимпиада пуçланас умĕн ялти пĕтĕмĕшле вăтам пĕлÿ паракан шкул территорийĕнче хоккей площадки уçăлчĕ.
Хÿме тытнă каток йĕри-тавра тĕрлĕ тĕслĕ ялавсем вĕлкĕшеççĕ, илемлĕ кĕвĕ янăрать. Пухăннă çынсен сăнĕсенче хаваслăх çиçет. Коньки сырнă ачасем пăр çинче ярăнаççĕ.Чи пĕчĕкки вара кунта -М.Шерне. Коньки çинче çирĕп тăрать.
Акă, Шупашкар, Канаш, Тăвай энергосеть уйрăмĕсенчен кĕтнĕ хăнасем килсе çитрĕç.Уява райадминистраци пуçлăхĕн çумĕ В.Чайкин уçрĕ. Канашри Кăнтăр электричество сечĕсен производство уйрăмĕн директорĕ, хамăр ял çынни В.И.Титов пуçарăвĕпе, вăл ертсе пынипе тата тăрăшнипе çак катока уçни çинчен пĕлтерчĕ. Район администрацийĕн пуçлăхĕ В.А.Ванерке, «Чувашэнерго» (МРСК Волги) тĕп инженерăн çумĕ И.М.Шкриль, Канашри Кăнтăр электричество сечĕсен производство уйрăмĕн директорĕ В.И.Титов, Тăвайри РЭС начальникĕ Т.И.Иванов, «Аль»
ФСК директорĕ А.Н.Кириллов тухса калаçрĕç. Хăнасем çак каток ачасен сывлăхне çирĕплетме, пушă вахăта усăллă ирттерме, спорт енĕпе аталанма пулăшни çинчен чарăнса тăчĕç. Кунта хĕлле хоккейла, çулла футболла выляма пулать. Чутей ялĕпе юнашар вырнаçнă ялсенчи ачасемшĕн те ку каток чаплă парне пулчĕ.
Килнĕ хăнасем Чутей шкулне спорт хатĕрĕсем парнелерĕç.
Юлашкинчен ял тăрăхĕн пуçлăхĕ Л.И.Медведев, шкул директорĕн ĕçĕсене туса пыракан Н.В.Большов тата профком председателĕ Н.С.Куракина çакăн пек пысăк та хаклă парнешĕн хăйсен, вĕренекенсен тата ашшĕ-амăшĕсен ячĕпе тав турĕç.
Малалла уява районти культура çуртĕнче ĕçлекенсем тăсрĕç. Вĕсем хитре юрăсем шăрантарса çынсен кăмăлне çĕклерĕç. Хĕл Мучипе Юр Пике ял çыннисене вăйă картине пухса савăнтарчĕç.
Уяв вĕçнелле шкул ачисенчен йĕркеленнĕ «Упа» тата»Барс» командăсем хоккейла, Канаш тата Тăвай электрикĕсем футболла вылярĕç
Халĕ, хĕллехи каникул вăхăтĕнче, хоккей площадкинче кăнтăрла та, каçхине те ачасен хаваслă сасси илтĕнет. « Питĕ пысăк тав Валерий Иванович Титова пире çакăн пек пысăк парне кÿнĕшĕн», - теççĕ вĕсем.
З.Иванова,
Л.Михайлова.
Чутей ялĕ.