Публикации » Ветерана – Тав çырăвĕ

Тăван çĕр-шывăн Аслă вăрçин ветеранĕ Григорий Филиппович Морозов çак кунсенче 90 çул тултарнă. Паллă юбилейпе ăна Тăвай район администрацийĕн пуçлăхĕ Владимир Ванерке, Чутей ял тăрăхĕн пуçлăхĕн çумĕ Валентина Куприянова саламланă. Григорий Филиппович вăрçă çулĕсене, мирлĕ вăхăтра ĕçленĕ самантсене аса илнĕ.

Ял-йышра хисеплĕ çынсенчен пĕри вăл. Хуçалăхăн выльăх-чĕрлĕх фермисенче, машинăпа трактор паркĕнче хуралçăра, клубра кочегарта ĕçленĕ. Тухăçлă хăмла туса илсе те тĕрлĕ наградăсене тивĕçнĕ.

“Обществăлла ĕçсенче те хастарччĕ. Сăпай та ырă чун-чĕреллĕ пирĕн Григорий Филиппович, туслă çемье вĕсен”, – теççĕ Çĕнĕ Ишпуçĕнче Морозовсем пирки.

Григорий Филипповичпа Мария Самуиловна Василий ывăлĕн çемйипе пурăнаççĕ. Надежда кинĕ те ватăсен канлĕхĕшĕн тăрăшать.

Владимир Алексеевич вăрçăпа ĕç ветеранне Раççей Президенчĕн Тав çырăвне тата асăнмалăх парне панă. Ватă салтак хăйне киле пырсах çапла сума сунăшăн ăшшăн тав тунă.

Р.ШУМОВА.