15 октября 2013 г.
Эпир савăнăçлă, телейлĕ пурăнччăр тесе пирĕн мăн асаттесем, аттесем Тăван çĕр-шыва хÿтĕлеме ĕлĕкренех çар ретне тăнă, вăрçă вăхăтĕнче паттăррăн çапăçса пуçĕсене хунă. Хальхи мирлĕ вăхăтра та яш-кĕрĕм çĕр-шыва, пире сыхлама хĕсмете каять, çавăнпа та эпир лăпкă çывăратпăр, савăнатпăр, вĕренетпĕр. Вĕсене çĕре çитиех тайма пуç уншăн.
Кăçал Чутей каччисем И.Медведевпа Н.Походкин салтак тивĕçне пурнăçласа таврăнчĕç. Иван Краснодарта, Коля Иркутскра службăна ирттерчĕç. Хальхи вăхăтра О.Павлов тата А.Мясников хĕсметре тăраççĕ. Вĕсен ашшĕ-амăшĕ патне тав çырăвĕсем килнине пĕлтĕмĕр. Манăн сăмахăм Николай Вячеславович Походкин çинчен пырĕ.
Вăл 1994 çулхи кăрлачăн 4-мĕшĕнче çуралнă. Шкулта вĕреннĕ вăхăтрах спортпа туслăччĕ. Районта ирттерекен футбол, волейбол турнирĕсенче медальсене те тивĕçнĕ вăл. Ĕçчен ача килĕнче те ашшĕ-амăшне пулăшнă. 11 класс пĕтернĕ хыççăн Шупашкарти строительство техникумне вĕренме кĕнĕ. Пĕрремĕш курс хыççăн каччă Тăван çĕр-шыв тăнăçлăхне сыхлама тăнă.
Кольăпа тĕл пулма кăмăллă: сăпайлă, лăпкă калаçать. Сăмах май, хĕсметри пурнăçĕпе кăсăклантăм пĕринче. Николай малтанхи уйăхсенче снайпера вĕреннĕ. Салтак службăра чăваш ятне яман. Тĕл перессипе пĕр хутчен кăна мар çĕнтернĕ. Уйрăм командирĕ, караул начальникĕн пулăшаканĕ, ушкăн командирĕ пулнă.
«Çĕр-шыв хÿтĕлевçин çирĕп сывлăхлă пулмалла. Ирхи апатчен 5 км чупса килеттĕмĕр, унтан – зарядка, тренировкăсем, турник çинче туртăнмалла. Тĕл пеме, компассăр тайгаран тухма, аманнă салтака çапăçу хирĕнчен илсе тухма, тăшман тапăнчĕ пулсан, унпа кĕрешме пĕлмелле тата ытти те», – тет ĕнерхи салтак. Каннă вăхăтра вара Н.Походкин кĕçĕн сержант взводри салтаксене тĕнчере пулса иртекен çĕнĕ хыпарсемпе паллаштарнă, лекцисем вуланă. Чаç командирĕсем пултаруллă яша хисепленĕ. Чутей каччи çинчен çырнă характеристикăра çапла асăннă: “Дисциплинăллă, ытти салтаксемшĕн тĕслĕх пулса тăрать. Хăй умне лартнă задачăсене тивĕçлĕ, таса кăмăлпа пурнăçлать. Хушнине вăхăтлă та тĕплĕн пурнăçлать, ĕçчен, хăйĕнпе пĕрле службăрисене пулăшса пырать...”
Служба вăхăтĕнче лайăх енчен палăрнăшăн, спортри çитĕнÿсемшĕн Н.Походкин грамотăсем илме тивĕçлĕ пулнă. Тăван çĕр-шыва юрăхлă çын пăхса ÿстернĕшĕн командовани ашшĕ-амăшне тав тунă.
Халĕ Коля вĕренĕве хăйĕн техникумĕнчех малалла тăсать. Ăна ăнăçу, çирĕп сывлăх сунар.
З.ИВАНОВА. Чутей ялĕ.