Публикации » Чутейсем сортлаççĕ

Пучах хĕлле тулать текен ăнлавпа ĕçлесе пурăнма тăрăшаççĕ “Чутеевский” ял хуçалăх производство кооперативĕнче. Çакна хальхи вăхăтра хуçалăхра çитес çуракинче акмалли пĕрчĕллĕ тата пăрçа йышши тĕш тырă вăрлăхĕсене сортласа, пахалатса хума тимлени те çирĕплетсе парать.

–Пĕркунтарах пуçларăмăр аллама, – терĕ Виталий Леонидович Шерне управляющи. Вăл çак тĕллевпе К–531 Петкус-Гигантпа усă курнине каларĕ. Халиччен ОВС–25, ОС-4,5 тата ОВП–20 сортировкăсемпе ĕçленĕ. Вĕсем, мĕнле каламалла, тырра малтанхи хут тасатса-сăвăрса хатĕрлеме юрăхлă темелле. Петкус-Гигантăн вара тивĕçĕпе пĕлтерĕшĕ тарăнрах, унпа вăрлăхсене акмалăх тасатса йĕркелеççĕ. Чутейсем ăна туяннă. Куратпăр, ахаль лартмаççĕ агрегата. Виталий Леонидович ку вăхăт тĕлне 80 тонна урпа, 15 тонна çурхи тулă, 5–6 тонна вика аллани çинчен пĕлтерчĕ. Çурхи тулă вăрлăхне çине тăрсах улăштарас шухăшлă пулнине, мĕншĕн тесен вăл массăллă репродукцие куçса пынине каларĕ, пĕрчисем те вĕтĕ. Урпа ака кондицине тивĕçтерет, терĕ. Вăрлăхсене Çĕнĕ çул тĕлне алласа, тасатса пĕтерме палăртаççĕ. Уй-хир бригадинче ĕçлекенсене явăçтарнă ку ĕçе.

Сезонлă усă куракан ял хуçалăх техникине упрама вырнаçтарнине асăнчĕ. Хăшне-пĕрне юсасшăн та. Сеялкăсенчен пуçлăпăр, терĕ.