18 февраля 2017 г.
Амалăх халăхĕпе те тĕлпулу иртнĕ. Пухăва иртнĕ çулхи ĕçсен отчечĕпе тата кăçалхи ĕçсен планĕпе паллаштарса Тĕмер ял тăрăхĕн пуçлăхĕ Геннадий Иванов уçнă.
Хăйĕн сăмахĕнче вăл социаллă сфера ыйтăвĕсем çинче тĕплĕн чарăнса тăнă, яла тирпей-илем кĕртес, урамсене çутă парас, çемьесене тата çамрăк специалистсене социаллă пулăшупа, халăха шывпа тивĕçтерес, право йĕркине пăсасран профилактика ĕçне вăйлатас ыйтусене, вырăнти пушар хуралĕн ĕçне хускатнă. Экономика сферипе илсен, пухăва хутшăннисем ял тăрăхĕн бюджетне пурнăçлас тата налук хунин ыйтăвĕсене сỹтсе явнă. Ял тăрăхĕн пуçлăхĕ вырăнти пĕлтерĕшлĕ ыйтусене татса пама тухнă тăкаксем çинчен те чарăнса тăнă.
РФ Президенчĕ 2017 çулта Экологи çулталăкĕ тесе пĕлтернине шута илсе пухура ял территорийĕн тасалăхĕ тата çỹп-çапа вăхăтра турттарса тухас, хĕллехи вăхăтра çулсене тасатса тăрас, урамсене çутатас, ялти клуб çивиттине, яла кĕрекен автоçула юсас тата ытти хăш-пĕр ыйтусене те çивĕчлетнĕ.
Пухура ЧР сывлăх сыхлав министрĕн заместителĕ Светлана Ананьева районти сывлăх сыхлав сферинчи тата спорт аталанăвĕн чи ырă енсене палăртнă. Районăн иртнĕ çулхи экономикипе социаллă пурнăçĕн аталанăвĕ çинчен Владимир Ванерке тĕплĕн чарăнса тăнă. Район бюджетĕнче харпăр хăй тупăшĕн тỹпи ỹссе пырать, вак тата вăтам предпринимательлĕх аталанать, районти предприятисем, çав шутра хресчен фермер хуçалăхĕсем сĕт, çĕр ĕç продукчĕсем туса илессине ỹстерсе пырассипе çине тăрса ĕçлеççĕ. Районта çĕнĕ ФАПсем ĕçе кĕреççĕ, ял клубĕсене юсав тăвассипе тата модернизацилессипе ĕçлеççĕ, Вăрманхĕрри ялĕ патĕнчен тытăнса пĕлтĕр çĕнетме пуçланă автоçула малалла юсасси çинчен те чарăнса тăнă.
Источник: "Ял ĕçченĕ"