03 февраля 2017 г.
Тăван çĕршывăн Аслă вăрçи вăхăтĕнче Ленинград хулине çавăрса илни чи хăрушă кунсем шутланнă. Блокадăран хăтарни вара пирĕн салтаксен паттăрлăхĕпе мухтавĕн символĕ пулса кĕнĕ историне.
Çамрăксене çитĕнекен ăрăва патриотизмла воспитани парас тĕллевпе çак кунсенче Тĕмерти культура çуртĕнче культработниксемпе "Парăнман Ленинград" асăну урокĕ ирттернĕ. Занятине тăваттăмĕш класра вĕренекенсене чĕннĕ. Вĕсен класс ертỹçи Е.Романова та пулнă ачасемпе.
Вăрçă, блокада, паттăрлăх çинчен каласа панă ачасене. Çав блокада кунĕсенче Ленинградри шкулсемпе библиотекăсем мĕнле ĕçлени çинчен каласа кăтартнă. "900 кунлăхри паттăрлăх" документлă фильмпа паллашнă ачасем.
Мероприятин тĕп пайĕ хыççăн гвоздика чечекĕсене блокадăллă Ленинград лентисемпе илемлетнĕ. Вĕсем пурнăç, çĕнтерỹ, туслăх, асăну символĕ пулса тăнă. Метроном сассипе çамрăк вулакансем пĕр минут шăп тăрса, блокадăри Ленинград паттăрĕсене асăннă.
В.ФЕДОРОВ.
Сăн ỹкерчĕкре: ачасем асăну урокĕнче
Источник: "Ял ĕçченĕ"