22 ноября 2016 г.
"Граждансен сывлăхне табак тĕтĕмĕн сиенлĕ витĕмĕнчен хỹтĕлесси çинчен" федераллă закона (2013 çулхи февралĕн 23-мĕшĕнче йышăннă) мĕнле пăхăннине Роспотребнадзорăн Чăваш Енри управленийĕ тĕрĕслесе тăрать. 2016 çулхи 9 уйăхра закона пăснăшăн административлă майпа явап тыттармалли çинчен 65 йышăну (5-шĕ - асăрхаттарни, 60-шĕ - штрафсем) кăларнă. Çав шутра 7 юридици тытăмне, должноçри 19 çынна, 16 предпринимателе, 18 гражданина штрафланă. Вĕсен пĕтĕмĕшле виçи 696,87 пин тенкĕпе танлашнă.
Уйрăм территорисенче, пỹлĕмсенче, объектсенче, çав шутра ача-пăча площадкисенче те, табак туртнăшăн явап тыттарнисем 4 çын кăна. Табак изделийĕсене закона пăсса сутнăшăн 31 штраф хунă. Вĕсенчен Чăваш Республикин ШĔМĕн материалĕсем тăрăх 18 çул тултарманнисене сигарет сутнăшăн 14 штраф пулнă (193 пин тенкĕлĕх).
Хăш-пĕр магазинсем вĕренỹ учрежденийĕсенчен 100 метртан çывăхрах вырăнсенче табак изделийĕсем сутма юраманнине пăхăнмаççĕ. Йĕркене пăснисен шутĕнче Тăвай районĕнчи Енĕш Нăрвашпа Элпуç магазинĕсем те пур, вĕсенче табак изделийĕсене вак суту-илỹ валли палăртнă чи пысăк виçерен те хаклăрах сутнă.
ЧР ШĔМĕн материалĕсем тăрăх Элĕк районĕнчи пĕр предпринимателĕн лавккинче иккĕленỹллĕ ятарлă маркăллă сигаретсем сутни палăрнă, суд йышăнăвĕпе ăна 10 пин тенкĕлĕх штрафланă, 830 пачка туртмаллине конфискациленĕ.
Çамрăксем кальян туртасси еннелле сулăнни палăрать. Роспотребнадзор асăрхаттарать: кальян та хăрушлăх кỹрет, сывлăха сигаретран вăйлăрах сиенлет. Ăна туртакан пĕр сехетлĕх сеанс вăхăтĕнче 100-200 сигарет чухлĕ тĕтĕм ĕмсе илет. Кальянăн шĕвĕ фильтрĕ наркăмăшлă хутăшсене тытса юлаймасть, çавна май çынсен чĕрепе юн тымарĕсен, рак, ытти чирсемпе аптăрас хăрушлăх ỹсет. Ăна туртни çывăхри ытти çынна та витĕм кỹрет. Сигаретпа танлаштарсан, кальян туртакансен юнĕнче никотин ытларах та. Кальянпа усă курса табаксăр хутăшсем туртни те сиенлĕ. Çын пурпĕр сĕрĕм ĕмсе илет, вăл вара юн гемоглобинĕпе хутăшнă май пуç мимине, ытти органсене кислород йĕркеллĕ пырса тăрассине чăрмантарать. Сĕрĕм тĕп нерв системине витĕм кỹнипе çын тăн çухатасси те аякра мар. Ялан пуç ыратма пуçлать, каярахпа вара психика енĕпе сывлăх хавшать.
Роспотребнадзор управленийĕ табак е кальян туртнипе çыхăннă сиенлĕ йăларан яланлăхах хăтăлма чĕнсе калать.
Н.ЛУГОВСКАЯ, Роспотребнадзорăн Чăваш Енри управленийĕн ертỹçи.
Источник: "Ял ĕçченĕ"