26 октября 2016 г.
Амалăх ялĕнчи культура çуртне районти Енĕш Нăрваш халăх театрĕ Николай Айзманăн "Шикли-шикленнĕ, кĕрĕк пĕркеннĕ" комедийĕпе килчĕ. Ял халăхĕ тарават кĕтсе илчĕ енĕшнăрвашсен артисчĕсене. Асăннă халăх театрĕ хăйĕн пултарулăхĕн çĕнĕ сезонне "Тамаша" театрĕн сенкер чаршавĕ" ятпа пуçларĕ. Н.Айзманăн "Шикли-шикленнĕ, кĕрĕк пĕркеннĕ", Н.Сидоровăн "Виçĕ хĕре пĕр каччă", Ю.Мишшин "Хĕрарăм юратăвĕ", З.Васильеван "Мĕн вăл тамаша?", "Ача хăварни" произведенийĕсемпе усă курса пĕр сехет çурă халăха савăнтарчĕ.
Николай Айзманăн "Шикли-шикленнĕ, кĕрĕк пĕркеннĕ" комедийĕнче Фрося, Тит Нилч, тухтăр ролĕсене З.Васильева, В.Ефимов тата Г.Русская çав тери кăмăла килмелле вылярĕç. Питĕ савăнчĕç ял çыннисем артистсен ăсталăхĕпе. Татах килсе çỹреме ыйтрĕç.
Н.ИВАНОВА. Амалăхри культура çурчĕн администраторĕ.