25 октября 2016 г.
Чăваш Ен Пуçлăхĕ Михаил Игнатьев ял хуçалăх министрĕпе Сергей Артамоновпа, Апат-çимĕç фончĕн директорĕпе Александр Федотовпа тата "Чăвашçăкăрпродукчĕ" АО директорĕпе Владимир Яковлевпа тĕл пулнă, тырă рынокĕнчи лару-тăрăва сỹтсе явнă.
Республикăра тĕш тырăпа пăрçа йышши культурăсене йăлтах пухса кĕртнĕ. Вĕсене ытларах Апат-çимĕç фончĕпе "Чăвашçăкăрпродукчĕ" акционер обществи туянаççĕ.
Регион ертỹçи палăртнă тăрăх, Раççейре çитĕнтернĕ тырă хамăра та çитет, чикĕ леш енне сутмалăх та пур. Çĕршыв пỹлмине 116 миллион тонна кĕнĕ. Михаил Игнатьев тĕнчери тата çĕршыври тырă рынокĕнчи лару-тăрăва танлаштарни ял хуçалăх таварĕ туса илекенсене çитес çул малашлăха шанса ĕçлеме ырă тĕллевсем çуратать.
Сергей Артамонов республикăри аграрисем кăçал 640 пин тонна тырă пухса кĕртни çинчен хыпарланă. Выльăх ĕрчетекен пысăк комплекссем фураж саппаслăх хатĕрленине пĕрле шутласан вăл юпа уйăхĕн 1-мĕшĕ тĕлне 724 пин тоннăпа танлашать. "Чăвашçăкăрпродукчĕ" АО тата Апат-çимĕç фончĕ 85 пин тоннăран ирттерсе (пĕлтĕрхипе танлаштарсан 146 проц.) тырă туяннă. Михаил Игнатьев каланă тăрăх, тырра пĕлтĕрхинчен ирттерсе хатĕрлени пулас йывăрлăхсене çăмăллатма май парать. "Халĕ 2017 çулхи тухăçшăн тăрăшатпăр. Эпир планпа палăртнă 16 пин тонна минераллă удобрение кỹрсе килетпĕрех", - тенĕ Александр Федотов.
-Минераллă удобрени кĕркунне çуркуннехинчен йỹнĕрех, - палăртнă Чăваш Ен Пуçлăхĕ. Ăна вăхăтра тата çителĕклĕ хатĕрлеме, хушма хуçалăха аталантаракансене ытларах сутма майсем шырама сĕннĕ.
Тĕлпулура фуражлăх тырă туянасси пирки те калаçнă.
-Кăçал унăн хакĕ 13 тенке çитрĕ, - тенĕ М.Игнатьев.
Источник: "Ял ĕçченĕ"