25 октября 2016 г.
Кĕркуннехи призыв тапхăрĕнче Чăваш Енрен 1552 каччă çар ретне тăрĕ. Çав шутран 1230-шĕ Хĕç-пăшалă вăйĕсенче служба тивĕçĕсене пурнăçлĕ, 312 çын - Наци гвардийĕнче, 10 яш вара Президент полкĕнче пулĕ.
Чăваш Республикин çар комиссариачĕн Канаш хулинчи, Канаш тата Тăвай районĕсенчи пайĕнче Тăвай районĕн администрацийĕн пуçлăхĕ Владимир Ванерке председатель пулса ертсе пынипе кĕрхи призыв комиссийĕн ларăвĕ иртнĕ. Ларăва ЧР çар комиссариачĕн Канаш хулинчи, Канаш тата Тăвай районĕсенчи пайĕн начальникĕ Юрий Барышов, Тăвайри тĕп больницăн пĕтĕмĕшле практика врач-терапевчĕ Татьяна Михайлова, халăха социаллă хỹтлĕх паракан пай начальникĕ Людмила Аввакумова тата ыттисем хутшăннă. Вĕсен призывниксем тĕлĕшпе йышăну тумалла пулнă.
Кĕрхи призывпа пирĕн районтан 25 çамрăкăн çар ретне тăмалла. Сăмах майăн каласан, çуркунне пирĕн районтан 30 çын çар службине кайнă.
Комиссин пĕрремĕш кунĕнче 23 çамрăкăн хучĕсемпе паллашнă. Вĕсем пурте Раççей çарĕнче службăра тăма хатĕр пулнине пĕлтернĕ.
И.ИВАНОВ.
Источник: "Ял ĕçченĕ"