23 июня 2016 г.
Чăваш халăхĕн тĕп наци уявĕ - Республика кунĕ çывхарать. Июнĕн 24-мĕшĕ, канмалли уяв кунĕ, вăл ĕçлĕ тĕлпулусемпе, культурăпа спорт мероприятийĕсемпе пуян пулĕ.
Кăçал уяв мероприятийĕсем Шупашкарта тата Элĕк районĕнче иртĕç. Шупашкарта иртекен уяв программипе килĕшỹллĕн тĕрлĕ куравсем, фестивальсем, концертсем йĕркелĕç.
Июнĕн 23-мĕшĕнче 10 сехетре Чăваш патшалăх оперăпа балет театрĕнче "Раççей регионĕсем - çитĕнĕвĕн çĕнĕ точкисем" Шупашкарти IХ экономика форумĕ ĕçлеме пуçлать. 11 сехетре Наци музейĕн картишĕнче "Маçтăрсен Руçĕ" конкурс уçăлĕ. 20 сехетре Хĕрлĕ лапамра "Раççей çăлкуçĕсем" фестиваль иртĕ. 23 сехетре фейерверксен фестивальне курма пулĕ.
Июнĕн 24-мĕшĕнче 11 сехетре Анне-хỹтĕлевçĕ Монуменчĕ çывăхĕнче Пĕтĕм чăвашсен тăваттăмĕш Акатуйĕ пуçланĕ. 12 сехетрен пуçласа 15 сехетчен Шупашкарти уçă лапамсенче - "Раççей çăлкуçĕсем" фестивале хутшăнакан пултарулăх коллективĕсен концерчĕсем. 15 сехетре Хĕрлĕ лапамра фольклор коллективĕсен Республикăри халăх пултарулăх центрĕ йĕркеленнĕренпе 80 çул çитнине халалланă концерт иртĕ. Çак вырăнтах 16 сехет те 30 минутра "Ĕмĕрсен эрешĕсем" наци костюмĕн уявĕ пулĕ. 17 сехетрен пуçласа 18 сехет те 30 минутчен Ленин проспектĕнчен пуçласа Хĕрлĕ лапам патне çитиччен "Раççей çăлкуçĕсем" фестивале хутшăнакансем утĕç. Ун хыççăн гала-концерт пулĕ. Унтан фейерверксен фестивалĕн çĕнтерỹçисем пин-пин çутăпа тỹпене йăлкăштарса савăнтарĕç.
Çак кунах Элĕк районĕнче Республика кунне халалланă мероприятисем иртĕç. Пирĕн районта та Раççейри çамрăксен тата Чăваш Республикин кунĕсен ячĕпе паян шкултан вĕренсе тухакансен балĕ, каçхине чăваш артисчĕсем хутшăннипе концерт, уяв дискотеки пулать.
Источник: "Ял ĕçченĕ"