26 февраля 2016 г.
Час-часах район центрĕнче пулатăп эпĕ, хаçат редакцине, ытти хăш-пĕр учрежденисене те кĕрсе тухатăп хама тата çынсене пăшăрхантаракан ыйтусемпе. Шурă халатлисем патĕнче те, районти тĕп больницăра, пулма тивет. Тепĕр чухне черет кĕтсе чылай çеç вăхăт иртет. Çав вăхăтра вара паллакан çынсемпе те, ыттисемпе те сăмах пуçаратăн. Вĕсем хăйсен нушисем çинчен каласа кăтартаççĕ. Акă, черетлĕ диспансеризаци вăхăтĕнче чылай паллакан çынпа тĕл пултăм. Сăхăтпуç, Йăнтăрчă, Улянкă, Тенеяль тата Çăлпуç çыннисем хăйсен нуши çинчен хыпар турĕç. Эпĕ район хаçатне çырса тăнине пĕлнĕрен манпа пушшех те чĕререн калаçма тăрăшрĕç. Вĕсене хăйсенчен пухакан сĕт хакĕ йỹнелсех пыни хытă пăшăрхантарать е, тĕрĕсрех каласан, çырлахтармасть. Тĕлĕнмелле ĕнтĕ, халăхран пухакан пĕр литр сĕтĕн хакĕ çур литр лимонад хакне те тăмасть, вун çичĕ тенке кăна тăрса юлнă.
Сĕт пухакансем хăйсене питĕ ирĕклĕ тытнинчен, сĕт паракансене вуçех те ăнланма тăрăшманнинчен, хисеплеменнинчен тарăхаççĕ. Выльăх-чĕрлĕх усрама, унран продукци туса илме пĕртте çăмăл мар вĕт-ха хальхи пурнăçра, тăкакĕ те, вăй-халĕ те сахал мар тухать. Çакă вăл никама та ыраттармасть, никама та пырса тивмест тейĕн. Хакне хăйсене мĕнле кирлĕ, çавăн пек палăртайса лараççĕ сĕт пухакансем тесе ỹпкелешеççĕ манпа калаçакансем. Район ертỹçисем тата çỹлерехри должноçри çынсем хутшăнса çак ыйтăва татса парасса шанаççĕ.
Ф.ПЕТРОВ.
Источник: "Ял ĕçченĕ"