Публикации » Пĕрлĕхлĕ информаци кунĕнче

Тăвай районне ЧР вĕрентÿ тата çамрăксен политики министрĕн тивĕçĕсене пурнăçлакан Светлана Петрова ертсе пыракан информушкăн (”Вăрçă ветеранĕсен республикăри клиника госпиталĕ” бюджет учрежденийĕн тĕп врачĕ Елена Барсукова, “Чăваш кĕнеке издательстви” патшалăх унитарлă предприяти директорĕ, Чăваш Енри журналистсен союзĕн председателĕ Валерий Комиссаров, “Чăвашхлебопродукт” акционерсен уçă обществин генеральнăй директорĕ Алексей Ласточкин) килсе çитрĕ юн кун. Вĕсем малтан район администрацийĕн пуçлăхĕпе Владимир Ванеркепе тĕл пулнă.

Район администрацийĕн пуçлăхĕн пĕрремĕш çумĕ, АПК аталанăвĕпе экологи пайĕн начальникĕ Валерий Чайкин тата “Чăвашхлебопродукт” общество директорĕ Алексей Ласточкин администраци ĕçченĕсемпе калаçнă. Вĕсем тата Чăваш кĕнеке издательствин директорĕ Валерий Комиссаров, РФ пенси фончĕн районти Управленийĕн пуçлăхĕн çумĕ – пай начальникĕ Любовь Иванова “Ял ĕçченĕ” хаçат редакцийĕн коллективĕпе тĕл пулнă.

Район администрацийĕн пуçлăхĕ В.Ванерке, унăн çумĕсем В.Шакров тата А.Алексеев, вырăнти хăй тытăмлăх органĕсен ответлă работникĕсемпе пĕрле Тăвай, Тĕмер, Мучар ял тăрăхĕсен территорийĕсенче пурăнакансемпе, предприятисемпе организацисен ĕç коллективĕсемпе тĕл пулнă, ыйтусем çине хуравланă.

Пĕрлехи информаци кунĕнче влаçăн тата вырăнти хăй тытăмлăх органĕсен çурхи ака ĕçĕсене вăхăтра туса ирттересси, РФ пенси системине 2030 çулччен аталантарса çĕнетесси, коммуналлă пулăшăвăн 2013 çулхи тарифĕсем çинчен сÿтсе явнă.

Çавăн пекех çурхи шыв-шур вăхăтĕнче çынсен пурнăçĕн хăрушсăрлăхĕшĕн, тавралăха тирпей-илем кĕртме пуçлассишĕн тăрăшмалли пирки те сăмах хускатнă.

Кăнтăрла иртсен 13 сехетре районта пурăнакансене харпăр хăй ыйтăвĕсемпе йышăннă.