Публикации » Пирĕн районта – культура министрĕ

Тăвай енре кăçал Республика кунне уявлаççĕ. Çавна май Шупашкарти ертÿçĕсем асăннă пысăк мероприятие ирттерме мĕнле хатĕрленнипе интересленсех тăраççĕ, вырăна тухсах тĕрĕслеççĕ тăвайсем хăйсен тĕллевĕсене мĕнле пурнăçланине.

Эрне кун ĕçлĕ çул çÿревпе пирĕн района культура, наци тата архив ĕçĕсен министрĕ Вадим Петрович Ефимов килсе кайнă.

Сумлă хăнана район администрацийĕн пуçлăхĕ Владимир Ванерке кĕтсе илнĕ. Тăвайсен ĕçĕ-хĕлĕпе кĕскен паллаштарнă, Республика кунне хатĕрленсе мĕнле ĕçсем туса ирттерни çинче чарăнса тăнă тата умри задачăсене асăннă.

Унтан культура министрĕ Вадим Ефимов вырăна тухса паллашма кăмăл тунă тăвайсен ĕçĕ-хĕлĕпе, проектсем мĕнле пурнăçа кĕнипе.

Вăтам тата пĕчĕк предпринимательлĕх район экономикине çирĕплетме пулăшасси çулсерен лайăхланать. Туса кăларакан продукцисен, тĕрлĕ ĕçсен, пулăшусем парассин калăпăшĕ ÿсет. Çĕнĕ технологисемпе усă курнăран вĕсен ассортименчĕ пуянлансах пырать. Бюджетра та налук тÿлевĕсем пухăнса пыраççĕ. Предпринимательсем хăйсен ĕçне культурăллă йĕркелессишĕн тимлеççĕ.

Пĕлтĕр пурнăçа кĕнĕ инвестици проекчĕсенчен пĕри – Михаил Сергеевич Ивановăн автомашинăсем çумалли предприятийĕ. Вăл Тăвай ялĕнчи культурăпа кану центрĕнчен инçех мар вырнаçнă. Сумлă хăна унăн ĕçĕпе тĕплĕн паллашнă.

–Малтан 624 тăваткал метр çĕр илтĕмĕр, ăна ÿссе кайнă йывăçсемпе хăш-пĕр кивĕ хуралтăсенчен тасатрăмăр. Хамăн 3,5 миллион тенке хыврăм ку ĕçе. Автомашинăпа çÿреме юратакансене тивĕçтерме 2012 çул вĕçĕнче пуçларăмăр, – кĕскен хăйсен ĕçĕпе паллаштарнă предприниматель.

Паянхи кун 6 ĕç вырăнĕ тупăннă кунта. Пĕр уйăхри вăтам ĕç укçи кварталта 7 пин тенкĕпе танлашнă. Кунсерен 20 автомашина çуса тирпейлеççĕ вĕсем. Малашне тата авантарах ĕçлесшĕн, пулăшусен тĕслĕхĕсене нумайлатасшăн, талăкра 30 техникăран кая мар çума тытăнасшăн. Тепĕр 5 ĕç вырăнĕ хатĕрлесшĕн. Пĕр уйăхра вăтамран работниксене 12 пин тенкĕрен кая мар тÿлеме ĕмĕтленет М. Иванов.

Культура министрĕ В. Ефимов тĕрлĕ ыйтусем панă, Михаил Сергеевич вĕсене туллин хуравланă. Вадим Петрович юлашкинчен харсăр ĕçчене малашлăхра ăнăçусем суннă.

Йăнтăрчăри культурăпа информаци центрне çул тытнă çакăн хыççăн делегаци (культура министрĕ Вадим Ефимов, район администрацийĕн пуçлăхĕ Владимир Ванерке, социаллă аталанупа архив ĕçĕн пайĕн начальникĕ Наталия Чайкина). Комплекслă компактлă строительство программипе килĕшÿллĕн спортзалта 1766,40 пин тенкĕлĕх юсав ĕçĕсем туса ирттернĕ. Халь пĕр çуртра Йăнтăрчă ял тăрăхĕн администрацийĕ, полицин участокри пункчĕ, ветеринари участокĕ, Канашри почтамтăн вырăнти уйрăмĕ, “Ростелеком” общество, информаципе культура центрĕ вырнаçнă.

Йăнтăрчă ял тăрăхĕн пуçлăхĕ Ирина Хайдукова кĕтсе илнĕ хăнасене, фольклор ансамблĕ хăйĕн пултарулăхĕпе паллаштарнă. Спортзалри çамрăксемпе, ал ĕç тăвакан хĕрарăмсемпе калаçнă культура министрĕ. Ялта пурăнакансем патшалăх пулăшăвĕпе кăмăллă пулнине курса ĕненнĕ вăл.

Унтан Шупашкартан килнĕ хăна район администрацийĕн пысăк залĕнче пухăннă çынсемпе тĕл пулнă.

Малтан район администрацийĕн пуçлăхĕ Владимир Ванерке Тăвай енĕн социаллă пурнăçĕпе экономика аталанăвĕн 2012 çулхи пĕтĕмлетĕвĕсемпе тĕплĕн паллаштарнă, 2013 çулхи тĕллевсене палăртнă, (отчет хаçатăн иртнĕ номерĕнче пичетленнĕ), ыйтусем çине хуравланă.

Полицин районти уйрăмĕн пуçлăхĕн çумĕ Борис Борисов тăван енри йĕркелĕхе сыхласси мĕнле пулса пыни пирки кĕскен пĕлтернĕ, ыйтусем çине хурав панă.

Çакăн хыççăн ЧР культура, наци тата архив ĕçĕсен министрĕ В.Ефимов трибуна умне тухнă. Ял хуçалăхне аталантарма пулăшакан инвестицисен калăпăшĕ тăвайсен пĕлтĕр чылай ÿснине палăртнă вăл. Пĕрчĕллĕ тата пăрçа йышши культурăсене кăçал вăхăтра акса хăварса тухăçне ÿстерессишĕн тăрăшма сĕннĕ. Акана тухма топливăпа удобрени çителĕклĕ хатĕрлеме тĕрлĕ майсем шырассине шанни пирки пĕлтернĕ министр. Пĕчĕк тата вăтам предпринимательлĕхе аталантарассине тимлĕх ытларах уйăрма кирлине асăнса хăварнă. Çĕр участокĕсене патшалăх регистрацийĕ витĕр кăларассипе татах ĕçлеме кирли пирки каланă. Сывлăх сыхлавĕнчи, вĕрентÿри тата культурăри татса памалли тĕллевсене те хускатнă Вадим Петрович. Республика кунне çÿллĕ шайра хатĕрленсе кĕтсе илме суннă.

“Паснерка” турист базинчи ĕçсене йĕркелесе пыракан Петр Восторгин, Элпуç ял тăрăхĕн пуçлăхĕ Василий Козлов тата ыттисем ыйтусем панă. Вăтаялĕнче темиçе çул каялла тума пуçланă культура çурчĕн шăпине татса пама специалистсем яма пулнă культура министрĕ.

Юлашкинчен Чăваш Республикин Пуçлăхĕн М.Игнатьевăн хушăвĕпе килĕшÿллĕн ĕçре тата вĕренÿре палăрнисене уйăхсерен стипенди илме “Шимкусский” ЯХПКн машинăпа ĕне сăвакан операторне Екатерина Георгиевана тата Тăвайри вăтам шкулта вĕренекенсене – Виктория Григорьевапа Ольга Лебедевана свидетельствăсем панă. “Акконд–агро фирма” обществăн тĕп агрономĕ Анатолий Михайлов Раççей Президенчĕн Тав хутне тивĕçлĕ пулнă.

 

Сăн ÿкерчĕксенче: ЧР культура, наци тата архив ĕçĕсен министрĕ В.Ефимов пирĕн районта пулнă вăхăтра.