Публикации » Шупашкарта - Европа чемпионачĕ

19 июня 2015 г.

Чăваш Енĕн тĕп хули çакăн пек пысăк та сумлă шайри официаллă старта пĕрремĕш хут йышăнать. Раççей историйĕнче çăмăл атлетика енĕпе Европăн командăри чемпионачĕ пĕрремĕш хут иртет. Çакăн пек чыса Шупашкар хули 2012 çулта çĕнсе илчĕ. Регионти спорт ĕçĕнчи чи сумлă событие тивĕçлĕ шайра ирттерме икĕ çул çурăна яхăн хатĕрленнĕ.

Чемпионат 15 пине яхăн куракан вырнаçакан "Олимпийский" стадионта иртĕ. Кунта реконструкци ĕçĕсем тунă. Спорт сооруженине 1977 çулта çĕкленĕ. Çав тапхăртанпа вара хăш-пĕр юсавсемсĕр пуçне пысăк ĕçсем туман пулнă. Халĕ кунта администраци кабинечĕсем, хывăнмалли-тăхăнмалли пỹлĕмсем нумайланчĕç, çавăн пекех конференц-зал, пресс-центр пулни те хăтлăх кỹрет. Пахалăхлă телетрансляципе, сасăпа тивĕçтерме те майсем çителĕклĕ. Вĕсенчен те пахараххи - стадионта çĕнĕ йышши технологипе тунă тренировка арени пурри. Ăна йăлтах çĕнĕрен тунă теме пулать.

40 тĕрлĕ дисциплинăра вăй виçсе чи ăнăçлă пĕрлештернĕ команда пулассишĕн Белорусси, Германи, Великобритани, Испани, Итали, Норвеги, Польша, Украина, Франци, Финлянди, Швеци тата Раççей спортсменĕсем ăмăртĕç. Пĕтĕмпе вара икĕ пине яхăн хăнана кĕтсе илме палăртнă. Командăсем Шупашкара июнĕн 18-мĕшĕнче çитнĕ. 9 команда Франкфуртран тỹрĕ чартер рейсĕпе çитĕ. Пĕтĕмпе вара Чăваш Ен тĕп хулине çакăн йышши тăхăр рейс килмелле. Таможня тĕрĕслевне хăвăртлатма аэропортра хушма пост йĕркеленĕ.

Раççей сборнăйĕн ытларах пайĕ Шупашкара çитнĕ те ĕнтĕ. Раççей ялавĕн чысне 48 атлет хỹтĕлет, вăл шутра - Чăваш Ен Спорт министерствин А.Игнатьев ячĕллĕ спорт центрĕн вĕренекенĕ Анжелика Сидорова.

Чемпионат ĕçне массăллă информаци хатĕрĕн çĕр ытла представителĕ çутатать.

Чемпионата Хĕрлĕ площадьре июнĕн 19-мĕшĕнче 20.00 сехетре уçаççĕ. Команда чемпионачĕ июнĕн 20-21-мĕшĕсенче иртет.

(Хамăр инф.).

Источник: "Ял ĕçченĕ"