03 марта 2015 г.
Ĕнер ял тăрăхĕсен пуçлăхĕсен район администрацийĕн пуçлăхĕ çумĕнчи анлă канашлăвĕн кăçалхи виççĕмĕш ларăвĕ пулса иртнĕ. Унта çавăн пекех ĕç тăвакан влаçăн республикăри тата федераллă органсен районти уйрăмĕсен, райцентрти предприятисемпе организацисен тата администрацин структура подразделенийĕсен ертỹçисем хутшăннă.
Канашлăва хутшăннисем экономика, финанс, сывлăх сыхлав, вĕрентỹпе культура, социаллă хỹтĕлев сферинчи тата ытти отрасльсенчи актуаллă ыйтусене пăхса тухнă.
Районти оперативлă лару-тăрупа вырăнти полици уйрăмĕн начальникĕ Вениамин Обаськин, надзор ĕçĕн пай начальникĕ Владимир Михайлов, район больницин тĕп врачĕ Нина Бурдасова, "Энергосеть" ООО директорĕ Геннадий Сергеев, Тăвайри газ участокĕн начальникĕ Владимир Семенов, ветстанци начальникĕ Александр Шакин паллаштарнă.
Администраци пуçлăхĕн пĕрремĕш çумĕ - АПК аталанăвĕпе экологи пайĕн начальникĕ Валерий Чайкин ял хуçалăх предприятийĕсемпе хресчен фермер хуçалăхĕсем кăçал 9264 гектар çурхи тĕш тырă культурисем акма тата 940 гектар çĕр улми лартма планлани çинчен пĕлтернĕ. Паянхи куна 1690 тонна (74 процент) тырă вăрлăхĕ ака кондицине тивĕçтерет. Ял хуçалăх кооперативĕсенче отчетлă пухусем пуçланнă. Иртнĕ эрнере "Дружба" хуçалăхра пулнă, паян - Ленин ячĕллĕ ЯХПКра.
Администраци пуçлăхĕн çумĕ - вĕрентỹ пайĕн начальникĕ Олег Ломоносов районта "Ачалăхшăн, ачалăх ячĕпе" ыркăмăллăх акцийĕ малалла пыни, паянхи куна марафон пухмачне 9215 тенкĕ укçа пухăнни çинчен чарăнса тăнă, районти предприятисемпе учрежденисен ертỹçисене акцие хастар хутшăнма чĕнсе каланă.
Администраци пуçлăхĕн çумĕ - строительство, çул-йĕр тата пурăнмалли çурт-йĕрпе коммуналлă хуçалăх пайĕн начальникĕ Тамара Дьяконова юр кайса пынăçемĕн тавралăха тирпей-илем кĕртессипе ĕçлеме кирлине кăтартса панă.
Ку эрнере, мартăн 4-мĕшĕнче, Аслă Отечествăлла вăрçăра Çĕнтерỹ тунăранпа 70 çул çитнине халалласа Тăвайри вăтам шкулта "Тăватă ăру тĕл пулăвĕ" савăнăçлă мероприяти иртет, 11 сехетре пуçланать.
Мартăн 6-мĕшĕнче Пĕтĕм тĕнчери хĕрарăмсен кунĕ ячĕпе "Аль" ФСКра хĕрарăмсем нумай енлĕ кĕрешсе ăмăртаççĕ, 13 сехетре кĕрешме тытăнаççĕ.
Район администрацийĕн пуçлăхĕ Владимир Ванерке районти организацисемпе учрежденисен ертỹçисене маларах асăннă пур мероприятисемпе ĕçсене те хастар хутшăнма ыйтрĕ.
Канашлура район пурнăçĕнчи ытти тĕрлĕ ыйтусене те сỹтсе явнă. Урамсене çутатасси те, çулсемпе тротуарсене юр-пăртан тасатасси те, çурхи шыв-шурпа вут-кăвартан сыхланасси те - пурте тимлĕх ыйтаççĕ.
Г.ЕГОРОВА.
Источник: "Ял ĕçченĕ"