04 февраля 2015 г.
Çакăн пек пĕтĕмлетỹ тума пулать район администрацийĕн пуçлăхĕ Владимир Ванерке Амалăхра тата Тĕмерте пурăнакансемпе ирттернĕ тĕл пулусенчен. Вĕсенче чи малтанах Тĕмер ял тăрăхĕн пуçлăхĕ Геннадий Иванов иртнĕ çулта вырăнта пурнăçланă ĕçсем çинчен отчет туса панă тата малашлăх задачăсене палăртнă.
Ĕçсем планпа тата вырăнти бюджетпа килĕшỹллĕн пулса пынă. Ялсемпе урамсен тирпейлĕхĕ, тавралăха симĕслетесси, çỹп-çапа, йăлари хытă каяшсене турттарса тухасси, çынсене пурăнма хăтлă условисем туса парасси тимлĕхре пулнă. Бюджетпа пăхса хăварнă укçа-тенкĕпе, çав шутрах харпăр хăй тунă тупăшпа та туллин усă курнă. Харпăр хăй тупăшĕ планпа пăхнинчен ытларах та пухăннă (106,5 процент). Налуксем тата налук шутланман тупăшсем пухассипе те лайăхрах ĕçленĕ. Бюджетăн тĕп пайĕ çĕр тата пурлăх налукĕсемпе никĕсленсе тăрать.
Ялсен тирпейлĕхĕ, тасалăхĕ вĕсенче пурăнакансенчен хăйсенчен, вĕсен хастарлăхĕнчен, илемшĕн чуна парса тăрăшнинчен нумай килнине палăртнă Г.Иванов. Ял çыннисем ялсенче тата районта ирттерекен мероприятисене те активлăрах хутшăннине каланă отчетра.
2014 çулта ял тăрăхĕн территорийĕнче вырăнти бюджет укçи-тенкипе Амалăх ялĕнче Амур урамĕнче 137200 тенкĕлĕх каçă, Кармалта Афанасьевпа Лепешкин урамĕсем хушшинче 374378 тенкĕлĕх кĕпер тунă, Тĕмер ялĕнчи Николаев урамĕнче 21 пин тенкĕлĕх шыв пăрăхне реконструкци туса çĕнетнĕ, Калинин урамĕнчи шыв башни тавра 27 пин тенкĕлĕх карта çавăрнă, О.Кошевой урамĕнчи çăла тасатса йĕркеленĕ. "Раштав уйăхĕнче Вăтаялĕнче çĕнĕ фельдшерпа акушер пункчĕ ĕçлеме пуçларĕ, унта та тулашри коммуникацисем тата тирпей-илем кĕртме ял тăрăхĕн бюджетĕнчен 74 пин тенкĕ уйăрнă, Ленин урамĕнче вĕтĕ чул сарса 200 метр тăршшĕ çул юсанă", - тенĕ ял тăрăхĕн пуçлăхĕ Геннадий Иванов.
Çавăн пекех ытти кулленхи ĕçсене те туса пынă, вырăнти депутатсен Пухăвĕн 11 ларăвне ирттернĕ, профилактика ĕçĕсене тимлĕхе хунă тата ытти те.
Район администрацийĕн пуçлăхĕ Владимир Ванерке районăн 2014 çулхи экономикăпа социаллă пурнăç аталанăвĕн итогĕсемпе тата 2015 çулхи тĕллевсемпе паллаштарнă.
Тĕл пулусене пухăннă ял çыннисем хăйсене пăшăрхантаракан сахал мар ыйтăва хускатнă. Амалăхра фельдшерпа акушер пункчĕ тăвас, халăха ĕçмелли пахалăхлă шывпа тивĕçтерес ыйтусем малта тăнă. Тĕмерсем гидротехника сооруженийĕсене юсас пирки ыйтнă. Вĕсене вырăнти ял хуçалăх предприятийĕн шăпи те пăшăрхантарать тата ытти те. Ялсенче пурăнакансен ыйтăвĕсем çине район администрацийĕн пуçлăхĕ Владимир Ванерке, вырăнти ял тăрăхĕн пуçлăхĕ Геннадий Иванов тата районтан тĕл пулусене килнĕ тĕрлĕ шайри представительсем хуравсем панă.
И.ИВАНОВ.