Публикации » Юбиляра саламланă

05 сентября 2014 г.

Сентябрĕн 2-мĕшĕнче Вăтаялĕнче пурăнакан Павел Артемьевич Никитин 90 çул тултарнă. Вăл Аслă Отечественнăй вăрçă участникĕ, блокадăри Ленинграда хỹтĕлеме хутшăннă. 1942 çулта йывăр аманнă. Наградăсене тивĕçнĕ.

Вăрçă хыççăн чылай вăхăт вырăнти шкулта учительте ĕçленĕ. Мăшăрĕ те, Серафима Николаевна, учительница, ĕмрипе ачасене вĕрентнĕ. Вĕсем пĕр ывăлпа икĕ хĕр çуратса ỹстернĕ. Ачисемпе мăнукĕсем тăван республикăн тĕрлĕ кĕтесĕнче пурăнаççĕ. Павел Артемьевич хăйĕн çулĕсене кура мар çирĕп курăнать, кил хуçалăхра тăрмашать, пурнăçри событисемпе, политикăпа интересленет.

Хăй вăхăтĕнче Павел Артемьевич хăйсен урамне тата кил пахчине йывăçсем чылай лартса чĕртнĕ, çак ĕçе ачисене те явăçтарнă. Нумайранпа пыл хурчĕсем ĕрчетет. Ĕне выльăхсемсĕр пуçне кроликсем те усранă.

Вăрăм ĕмĕрлĕ юбиляра райадминистраци ĕçĕсен управляющийĕ - организаципе контроль ĕç пайĕн начальникĕ Е.Бельская тата Тĕмер ял тăрăхĕн пуçлăхĕ Г.Иванов саламланă. Вĕсем РФ Президенчĕн В.В.Путинăн саламне çитернĕ, хаклă парне панă тата çирĕп сывлăх, вăрăм кун-çул, канлĕ ватлăх суннă.

Сăн ỹкерчĕкре: ĕçпе вăрçă ветеранне саламланă вăхăтра.

Источник: "Ял ĕçченĕ"