Публикации » Савăнăçлă каç

Çĕнĕ çул пуриншĕн те – ваттисемшĕн те, çамрăксемшĕн те – чи савăнăçлă уяв. Кашниех ăна çĕнĕ ĕмĕтсемпе, çĕнĕ шухăшсемпе кĕтсе илме тăрăшать.

Тĕмерти ИКЦ çумĕнчи “Хавхалану” клуб членĕсемпе кану каçне пуçтарăнтăмăр. Çĕнĕ çул уявĕ çинчен ытларах пĕлес тĕллев пулчĕ пирĕн. Малтанах уяв историйĕпе, Хĕл Мучипе Юр пике ăçтан килнипе, тĕрлĕ çĕр-шывсенче кивĕ çула мĕнле ăсатнипе кăсăклантăмăр. Гороскоп тăрăх шыври хура çĕлен çулĕ камшăн мĕнле пулассипе те интереслентĕмĕр.

Хамăр хатĕрлесе килнĕ апат-çимĕç вăрттăнлăхĕсемпе паллашса техĕмлĕ чей ĕçме сĕтел хушшине лартăмăр. “Брокколи”, “Краснокочаннăй” сортлă купăстасенчен хатĕрленĕ салатсем, çулталăк символне халалланă “Змейка” салат, яланхи пекех Таисия Прокопьевна Зайцева пĕçерсе килнĕ тутлă кукăль пурне те килĕшрĕ.

Уява тăснă май лотерея билечĕсем выляттартăмăр, хаваслă вăйăсене хутшăнтăмăр. Хĕл Мучипе Юр пике зала пырса кĕрсен пĕчĕк ачасем пекех хĕпĕртерĕмĕр. Вĕсемпе пĕрле елка тавра тăрса çĕнĕ çул юррисене юрларăмăр, ташăсем ташларăмăр.

Пирĕн хушăра чи асли Елизавета Петровна Хвостова пулчĕ. Çамрăк чухнех юрлама-ташлама питĕ ăстаччĕ вăл. Сасси халĕ те шăнкăрав пекех янравлă, шÿтлеме те питĕ ăста. Мăшăрĕпе, Василий Ивановичпа, 2 ывăлпа 3 хĕр пăхса çитĕнтернĕ. Ачисене пурне те аслă пĕлÿ илме пулăшнă. Халĕ кермен пек çуртра шăкăлтатса пурăнаççĕ. Канмалли кунсенче вĕсен килĕ ачисен, мăнукĕсен хаваслă сассисемпе тулать. 11 мăнук пурăнма вăй-хал парса тăрать Хвостовсене. Уяв сĕтелĕ хушшине пуçтарăнсан амăшĕпе пĕрле хĕрĕсемпе кинĕсем те юратнă юррисене шăрантараççĕ. Василий Ивановичăн шÿтлĕ халапĕсене вара мăнукĕсем çăвара карсах итлеççĕ.

Е.Хвостова почтальонкăра 22 çул ĕçлесе тивĕçлĕ канăва тухнă. Мĕн чухлĕ ăшă сăмах илтмен-ши вăл ырă кăмăлĕшĕн Турикасри пенсионерсенчен тата ытти хаçат-журнал çырăнакансенчен. Çĕнĕ çул ячĕпе саламласа Э.Г.Федорова ăшă сăмахсем каларĕ Лиза аппана, яланах пурнăçра кирлĕ сĕнÿсем панăшăн тав турĕ.

Тулли кăмăлпа вĕçлерĕмĕр кану каçне. Уява йĕркелесе ирттерме пулăшнăшăн ял тăрăхĕн пуçлăхне Г.И.Иванова, А.И.Павлова, ИКЦ ĕçченĕсене – И.И.Краснована, Г.П.Иванована, В.И.Смирнова пысăк тав сăмахĕ калатпăр, ĕçре ăнăçу, хастарлăх, çемьере юратупа телей сунатпăр.

 

Сăн ÿкерчĕксенче: клубра йĕркеленĕ выставкăн хăш-пĕр экспоначĕсем – хутран явса çыхнă шкатулкăсем, карçынккасем; урана тăхăнмаллисем.