Публикации » Хисеплисенчен пĕри

Тĕмерти ача садне халĕ 63 ача çÿрет. Иртнĕ уйăхра 20 ача йышăнмалăх ушкăн уçăлнă. Кунта ĕçлекенсем пĕчĕк шăпăрлансемшĕн садик иккĕмĕш кил пултăр, вĕсем тивĕçлĕ воспитани илччĕр тесе вăй-халне шеллемеççĕ. Ирина Краснова заведующи вĕсенчен кашнин пирки ырă сăмахсем калать. Любовь Яковлева кунта пиллĕкмĕш çул тăрăшать. Воспитателе пулăшакана ачасем юратаççĕ. Кашнинпех пĕр чĕлхе тупма пĕлет вăл. Сăпайлă та ăшă кăмăллă хĕрарăма ĕçтешĕсем те, ашшĕ-амăшĕ те хисеплеççĕ. “Паян Любовь Алексеевнан çуралнă кунĕ. Ырлăх-сывлăх, телей, ĕçре ăнăçусем сунатпăр ăна хамăр коллективран”,– терĕ Ирина Петровна.

Мăшăрĕпе Александр Николаевичпа икĕ ача пăхса ÿстереççĕ вĕсем. Асли МАДИнче вĕренет, кĕçĕнни 5 класа çÿрет. Яковлевсен çемйи ялти ĕçчен те пултаруллисенчен пĕри.

 

Сăн ÿкерчĕкре: Л.А. Яковлева ачасемпе пĕрле.

Е.БЕЛЬСКАЯ сăн ÿкерчĕкĕ.