Публикации » Хĕрĕх çул руль умĕнче

Арçыннăн хăй ĕмĕрĕнче çурт тумалла, йывăç лартмалла, ывăл ÿстермелле, – теççĕ халăхра. Çак пурнăç тĕллевĕсене Тĕмер ялĕнче пурăнакан Владимир Васильевич Соколов чыслăн пурнăçланă.

Вăл 1952 çулхи нарăсăн 20-мĕшĕнче çуралнă. Амăшĕпе кăна ÿснĕ виçĕ ача. Валентина Александровна пепкисене тĕрĕс воспитани парас тесе нумай тăрăшнă. Тĕмер шкулне уçнă Тороповсен династине малалла тăсса, ĕмрипех кĕçĕн классен учителĕнче тăрăшнă вăл. Володя çемьере кĕçĕнни пулнă. Верăпа Люба аппăшĕсем хăйсен çемйисемпе пурăнаççĕ.

Владимир Васильевич 8 класс пĕтернĕ хыççăн Ленинград хулине çул тытнă. Сантехник профессине алла илнĕ вăхăтра каçхи курса çÿресе водителе вĕреннĕ.

Ĕç биографине Тĕмер каччи Питĕр хулинче пуçланă. Çар тивĕçне пурнăçланă хыççăн, хăй вĕреннĕ çĕре те чĕннĕ ăна ĕçлеме, хваттерпе те тивĕçтерме шантарнă, анчах çамрăкăн чунĕ тăван енех туртăннă. Вара вăл “Победа” совхозра водительте ĕçлеме пуçланă. Тĕмерти культура çуртне те ертсе пынă пĕр хушă, чун хавалĕпе тăрăшнă ялти культура пурнăçне аталантарма. Тĕмер клубĕ Владимир Васильевич ĕçленĕ çулсенче кĕрлесе тăнă тесен те йăнăш пулмĕ. Концертсем, спектакльсем час-часах кăтартнă, ытти ялсене те çитнĕ. Лайăх ĕçленĕшĕн клуба “Комета” магнитофон та парнеленĕ. Анчах çамрăкăн чунĕ техника еннех туртăннă. Вара вăл тепĕр хут машина рулĕ умне ларнă.

1976 çулта Владимир Васильевичпа Лидия Аркадьевна пĕрлешсе комсомолла туй тунă. Ялтах тĕпленес тесе çĕнĕ çĕрте çурт никĕсне хывнă, туса пĕтерсен ватă амăшне пĕрле пурăнма илсе пынă.

Ăста водителе çĕнĕ автобус “хăвалама” Кургана янă. Çавăнтанпа 40 çул водительте тăрăшать В.Соколов. 2004 çултанпа Тăвайри “Дорстрой” обществăн автобус водителĕ вăл. Унта та ăна ăсталăхне кура çĕнĕ техника шанса панă. Хăй ĕмĕрĕнче автобуспа таçта та çитсе курнă. Мĕн чухлĕ çынна кирлĕ çĕре, туя илсе кайса килмен-ши. Тÿрĕ кăмăлĕпе, çул-йĕр правилисене тимленипе палăрса тăрать вăл. Чылай наградăпа, Хисеп грамотипе, тав çырăвĕпе чысланă ăна.

Техникăна чунтан парăннă, ăнланакан çын вăл. Ытти енĕпе те алли-ури ăста унăн. Çĕнĕ çурта куçсассăн çемйипе питĕ чаплă пахча чĕртсе ячĕç. Тавралăха илемлетес тесе халĕ те тĕрлĕ сортлă улма-çырла йывăçĕсем, пахча çимĕç лартса ÿстереççĕ, тăванĕсем те йывăç-тĕм лартма пуçтарăнсан Владимир Васильевича чĕнмесĕр хăвармаççĕ, çăмăл алăллă пулнипе-и, тен, ĕçе пуçлама ăна ыйтаççĕ. Нумай çул ĕнтĕ вăл хурт-хăмăрпа кăсăкланать. “Дорстрой” общество утар йĕркеленĕ вăхăтра Владимир Васильевич та хастар хутшăнчĕ çак ĕçе.

Соколовсем виçĕ ача пăхса çитĕнтернĕ, вĕсене тивĕçлĕ воспитани парса пурнăç çулĕ çине кăларнă. Асли Людмила больницăра медсестрара тăрăшать, мăшăрĕпе Юрăпа Канаш хулинче пурăнаççĕ, хĕр пĕрчи пăхса ÿстереççĕ. Алексей мăшăрĕпе Венерăпа Тăвайĕнче йăва çавăрчĕ, вăл шалти ĕçсен пайĕнче ĕçлет, икĕ ывăлпа хĕр çитĕнтерет çемье. Кĕçĕн хĕрĕ Надежда вара мăшăрĕпе Сашăпа Мускав хулинче ĕçлесе пурăнаççĕ, ывăл ÿстереççĕ. Ашшĕ-амăшне хисеплеççĕ ачисем, пулăшма тăрăшаççĕ. Мăнукĕсем вара еплерех юратаççĕ ăшă кăмăллăскерсене! “Каникула яла каятпăр эпир”, – теççĕ. Çакă мар-и вăл телей?

Çак кунсенче В.Соколова 60 çулхи юбилейĕпе район администрацийĕн пуçлăхĕ Юрий Егорович Васильев ĕçне пырсах саламларĕ, Хисеп грамотипе наградăларĕ, “Дорстрой” общество ертÿçи Владислав Васильевич Васильев та лайăх ĕçлекене тав туса ăшă сăмахсем каларĕ.

 

Сăн ÿкерчĕкре: В.Соколов рейса тухас умĕн.