Публикации » Пур ĕçе те ĕлкĕрет

Кÿршĕре кам мĕнле пурăнни йăлтах куç умĕнче, урăхла каласан алă тупанĕ çинчи пек. Хăйĕн пускилĕн Светлана Андриянован хастарлăхĕнчен тĕлĕнмеллипех тĕлĕнет 87 çулхи Елькка аппа.

Картиш тулли выльăх-чĕрлĕх, чăх-чĕп, хур-кăвакал, пахчи тĕрлĕ çимĕçпе пуян, пÿрт умĕнчи тĕрлĕ тĕслĕ чечекĕсем тавралăха илем кÿреççĕ.

–Кил-çурчĕ типтерлĕ, çимĕç йăранĕсем яланах таса, пур ĕçе те вăхăтра тăвать, кÿршисене те пулăшма ĕлкĕрет, вырăнпа выртакан амăшне те лайăх пăхать,– тет ун пирки ĕç ветеранĕ.

Светлана Геннадьевна Кивĕ Пуянкассинчен Тĕмере качча килнĕ. 10 ачаллă çемьере çитĕннĕ вăл. Çамрăклах колхоз уй-хирĕнче, фермăра ĕçленĕ. Унтан районти тĕп больницăна санитаркăна вырнаçнă. Малтан хирурги уйрăмĕнче ĕçленĕ. Халĕ реанимаци уйрăмĕнче йывăр выртакансене ура çине тăратма пĕтĕм вăй-халне парать. Хăйĕн тивĕçĕсене тÿрĕ кăмăлпа пурнăçлать. 25 çул хушшинче врачсемпе, медсестрасемпе пĕрле миçе çынран тав сăмахĕ илтмен-ши вăл(

Тĕмертен çÿрет пулсан та яланах вăхăтра вăл ĕç вырăнĕнче. Ытларах чухне маларах та çитет, тÿрех ĕçе пуçăнать. Çакăн пек пултаруллă та типтерлĕ санитаркăпа мĕнле кăмăллă ан пулччăр-ха коллективра. Больница администрацийĕ Хисеп грамотипе те хавхалантарнăччĕ С.Андриянована.

Мăшăрĕпе, Владимир Ниловичпа, килĕштерсе пурăнаççĕ. Виçĕ ачине те ура çине тăратнă ĕнтĕ. Хĕрĕ Олеся техникумра студентсене вĕрентнĕ, халĕ страхлакан компанинче, Саша йĕркелĕх службинче, Андрей водительте вăй хураççĕ. Савăнмалăх виçĕ мăнук ÿсет.

Канмалли кунсенче Андрияновсен пÿрчĕ хуларан килекен хăнасемпе тулса ларать. Валентина Кузьминична кунта пурăннăран, 9 ачи çемйисемпе тăтăшах амăшне курма, çуралнă кунĕпе саламлама килсех тăраççĕ. Паян вара çывăх çыннисем, тăванĕсем Светлана Геннадьевнана 50 çулхи юбилейĕпе саламлама тулли кĕрекене ларĕç, ырлăх-сывлăх, телей сунĕç, ăшă сăмахсем каласа тав тăвĕç.