08 февраля 2019 г.
Район администрацийĕн пуçлăхĕ В.Ванерке Тăван çĕршывăн Аслă вăрçинче вилнин тăлăха юлнă мăшăрне, Тенеялĕнчи Таисия Тимофеевна Терентьевана пурăнмалли çурт-йĕр тума е туянма пĕр хутчен паракан тӳлев илмелли ирĕк паракан свидетельство панă çак кунсенче. Тӳлев виçи 1225 пин тенкĕпе танлашать.
Владимир Алексеевич Таисия Тимофеевнана ăшшăн саламланă, çирĕп сывлăх суннă. Халăха социаллă хӳтлĕх паракан пай начальникĕ С.Порфирьева документсене мĕнле йĕркелемелли пирки ăнлантарнă.
РФ Президенчĕн «1941-1945 çулсенче Тăван çĕршывăн Аслă вăрçине хутшăннисене пурăнмалли вырăнпа тивĕçтересси çинчен» указĕпе килĕшӳллĕн пирĕн районта пурĕ 174 вăрçă ветеранĕ укçа-тенкĕ тӳлевĕ илнĕ пурăнмалли çурт тума е туянма.
Источник: "Ял ĕçченĕ"