23 августа 2016 г.
Кăçал Ĕç çыннин çулталăкĕ пулнă май, Тенеялĕнче пурăнакан Лидия Федоровна Иванова çинчен ăшă сăмахсем калас килет.
Вăл вăтам шкул пĕтернĕ хыççăн Патăрьелĕнче ветеринар специальноçне алла илет. Вĕренсе пĕтерсен пĕр хушă Нăрваш салинче ĕçленĕ. Çулталăкран вара, 1977 çулта, Мучарти ветеринари участокĕнче ĕçлеме тытăннă. 1979 çултанпа паянхи кунчченех "Новый путь" хуçалăхра пĕр çул улшăнмасăр ветеринари фельдшерĕнче вăй хурать. Лидия Федоровнан пĕтĕмĕшле ĕç стажĕ 40 çул. Тивĕçлĕ канура пулин те хăй юратнă ĕçĕнчен уйрăлаймасть-ха. Лидия Иванова обществăлла ĕçре те сатур. Вырăнти суйлав комиссийĕн председателĕ пулма шанаççĕ ăна, художество пултарулăх ушкăнĕпе тĕрлĕ мероприятие хаваспах хутшăнать. Ял çыннисен выльăх-чĕрлĕхĕ чирлесен яланах пулăшма васкать. Тăрăшулăхĕшĕн тав çырăвĕсем, грамотăсемпе хаклă парнесем илнĕ. Лидия Федоровнан Петя пиччĕшĕпе Юля аппăшĕ те Патăрьелĕнче ветеринара вĕренсе тухнă. "Новый путь" хуçалăхра вăй хунă.
Э.ДАНИЛОВА, Чăваш патшалăх университечĕн студенчĕ.
Источник: "Ял ĕçченĕ"