08 апреля 2013 г.
Йăнтăрчăри вăтам шкулта чĕрĕк ĕмĕр ытла чăваш чĕлхипе литературине вĕрентекен Галина Петровна Васильева учительницăшăн чи пахи – хăй пĕлÿ панă ачасем çитĕнÿ хыççăн çитĕнÿ туни. Вĕренекенсен хисепне тивĕçессишĕн çĕрне-кунне пĕлмесĕр тăрăшнă вăл. Ăнсăртран пулман ăнăçу.
1980 çулта Чăваш патшалăх университечĕн филологи факультетĕнче вĕренсе аслă пĕлÿ илнĕ хыççăн Тăвай районне килнĕ Патăръел хĕрĕ. Ăна Йăнтăрчăри вăтам шкула ĕçлеме янă.
Ÿссе пыракан ăрăва лайăх воспитани парас ĕçе хăйĕн çине илме ырă кăмăллă çын кăна пултарать. Профессине чунтан юратакан вĕрентекен çамрăксем патне чи кирлине, чи пахине çитерме пултарать.
Галина Петровна педагог çăмăл мар ĕçне чылай вăхăт уйăрать, ачасене чыслă, ырă, тĕрĕс çын пулма хăнăхтарать. Творчествăлла шухăшлама, хăйсем тĕллĕн йышăнусем тума вĕрентет вĕсене, тĕрлĕ сĕнÿсем парать. Йывăр самантсенче яланах пулăшать. Вĕренекенсен тавра-курăмне анлăлатсах пырас тĕллевпе нумай ĕçлет Г.Васильева учительница, вулать, аслă ĕçтешĕсен опытне те шута илет. Хăйĕн ĕçне чунтан парăннă вăл. Чăваш чĕлхипе, литературипе кăсăкланакан ачасене кружок ĕçне явăçтарнă, вĕсемпе тĕпчевсем тăвассине йĕркеленĕ Галина Петровна.
Унăн вĕренекенĕсем шкулта, районта, республикăра иртекен творчествăллă, интеллектуаллă конкурссен, конференцисен, олимпиадăсен çĕнтерÿçисем пулса тăраççĕ, парнесем илеççĕ.
Г.Васильева учительница – вĕренекенĕсемшĕн ырă тĕслĕх. 2008 çулта Раççей Президенчĕн премине илме тивĕçлĕ пулнă, 2012 çулта Тăвай район администрацийĕн грантне çĕнсе илнĕ вăл. Аслă категориллĕ вĕрентекене пултарулăхне кура районти чăваш чĕлхипе литературине вĕрентекенсен методика пĕрлешĕвĕн ĕçĕсене йĕркелесе пыма шаннă. Ку тивĕçе те çÿллĕ шайра пурнăçлать Галина Петровна. Районти вĕрентекенсене ырă сĕнÿ пама яланах хатĕр вăл.
Хăйĕн çулне суйласа илнĕ ачасем йышлăлансах пынишĕн хĕпĕртет чăвашлăхшăн тăрăшакан. Вĕренсе тухнисем шкула килсех çÿрени, уявсенче саламлани вĕрентекене тата лайăхрах ĕçлеме хавхалантарать.
Пысăк профессионализм та, кашни ачан чун-чĕри патне çул хывма тата вĕсен çитĕнĕвĕсемшĕн савăнма пĕлни те, хуйхисене вăхăтра пайлани те, чăвашлăх та, сапăрлăхпа сăпайлăх та пур Йăнтăрчăри вăтам шкулта нумай çул тăрăшаканра.
Ĕçри çитĕнÿсемшĕн Галина Васильевана “Раççей федерацийĕн пĕтĕмĕшле вĕрентĕвĕн хисеплĕ ĕçченĕ”, “Ĕç ветеранĕ” ятсене панă.
Икĕ ача пăхса çитĕнтереççĕ вĕсем мăшăрĕпе, Виталий Ивановичпа. 26 çул, пĕр-пĕрне хисеплесе-юратса пĕр сукмакпа утаççĕ Васильевсем. Хĕрĕ Санкт–Петербург хулинче фармацевт-провизорта ĕçлет, ывăлĕ – Шупашкарта. Галина Петровна килти ватăсемпе шăкăл-шăкăл калаçть, аслисен шухăш-кăмăлне тĕпе хывать. Пĕр-пĕрин сăмахĕнчен тухмаççĕ вĕсем.