Публикации » Бензин-топливăпа тивĕçтерсе

Район экономикишĕн, унта пурăнакансемшĕн вырăнта заправка станцийĕ пурри те питĕ пĕлтерĕшлĕ. Ку вăл ятарласа ытти çĕре кайса заправка тума тивнипе танлаштарсан, клиентсен вăхăтне те, укçи-тенкине те перекетлет, вырăнти бюджета та укçа-тенкĕ кĕрет.

1978 çулхи кĕркуннеччен Тăвай ялĕнче кирпĕч заводне хирĕç вырнаçнă заправка станцийĕ ĕçленĕ, вăл будка евĕрлĕ çуртра пулнă. Кунта А-80 маркăллă бензинпа тата дизель топливипе тивĕçтернĕ. Заправка станцийĕнчи ĕçе-хĕле Геннадий Никифорович Никифоров йĕркелесе пынă.

Унтан Канашри нефтебаза ертÿçисем кирпĕч завочĕ çывăхĕнчех çĕнĕ автозаправка станцийĕ тума йышăннă. Ăна хăвăртах туса пĕтернĕ. Строительсем Канаш хулинчен çÿренĕ. Вĕсене вырăнти ĕçченсем те пулăшнă: В.А. Краснова, В.М.Масленникова, Л.Данилова. Çу пуçламăшĕнчен тытăнса сивĕсем пуçланнă çĕрелле хута янă çĕнĕ автозаправка станцине. Тăрăшса, чуна парса ĕçленĕрен Валентина Красновапа Валентина Масленникована тата Людмила Данилована 76-мĕш номерлĕ автозаправка станцийĕ хута кайсан виççĕшне те оператора ĕçлеме илнĕ. Коллектива Г.Н.Никифоровах ертсе пынă. 27–30 çул таран тăрăшнă вара асăннă хĕрарăм-операторсем пĕр ĕçре. Валентина Мануиловна “Ĕç ветеранĕ” ята та тивĕçнĕ. Унăн пĕтĕм стажĕ – 41 çул ытла.

Çĕнĕ автозаправка станцийĕнче 25-шер кубла метрлă сакăр резервуар вырнаçтарнă, сакăр колонкăран бензинпа ытти çунтармалли-сĕрмелли япаласем панă.

1987 çулхи июньтен автозаправка станцийĕн коллективне Е.П.Яковлева ертсе пыма тытăннă. АЗС района çеç мар, ун тулашĕнчи çывăх ялсене те горючипе тивĕçтернĕ. Ун чухне коллективра пурĕ пиллĕкĕн ĕçленĕ.

2005 çулхи мартранпа 76-мĕш номерлĕ АЗС пуçĕнче М.А.Семенов тăрăшать. Пурнăç таппи автозаправка станцине те ырă улшăнусем кÿнĕ. Çуртăн фасадне тирпей-илем кĕртнĕ. Нефтепродуктсемпе тивĕçтерекен пăрăхсене улăштарса çĕнетнĕ. Станци çуртĕнче банк терминалĕсемпе усă кураççĕ. Операторсене условисем туса панă. Кăçал кондиционер та вырнаçтараççĕ.

Тăвайри АЗС “Нефтепродукт” ОООна пăхăнать. 2010 çулта автозаправка станцийĕн территорине çĕнетнĕ. “Дорстрой” ООО (ертÿçи В.В.Васильев) кивĕ асфальта хырса илсе, сеткăсем хурсах çĕнĕ технологипе асфальт сарса тикĕсленĕ территорие, ытти тирпей-илем ĕçĕсем пурнăçланă. Халĕ кунта чечек клумби те хывнă, бордюрсен периметрĕпе те чечексем илем кÿреççĕ.

Клиентсене вара паянхи кун М.А.Семенов, Е.И.Ильина, Н.Г.Петрова, М.В.Григорьева тивĕçтереççĕ, хăйсен тивĕçне тарăннăн ăнланса тăрăшаççĕ. Хальхи пурнăçра конкурентлăх пурри те тивĕçтерÿ пахалăхне ÿстерме хистет.