Публикации » “Ылтăн шайба” призĕшĕн

Республикăра шкул çамрăкĕсем хушшинче “Ылтăн шайба” клуб призĕшĕн хоккей ăмăртăвĕсем малалла пыраççĕ.

Ăмăртусенче, тĕпрен илсен, Тăвайри вăтам шкулта вĕренекен Чÿкçырмипе Вăрманхĕрри çамрăкĕсем ăсталăх кăтартаççĕ. Çапла аслă ушкăнри ачасем республика шайĕнче саккăрмĕш, вăтам ушкăнрисемпе кĕçĕн ушкăнрисем 6-мĕш вырăнсене йышăннă. Кĕçех ÿсĕмĕпе 10–11-мĕш классенче вĕренекен çамрăксем ăмăртмалла.

Кăçал, ытти çулсенчипе танлаштарсан, хоккей вăййи ытларах аталанса пыни сисĕнет. Хоккейпа чылай çул хушши пулман район чемпионачĕ те иртрĕ кăçал. Ăмăртусем, тĕпрен илсен, Вăрманхĕррипе Тăрмăш ялĕсенчи площадкăсенче иртеççĕ. Çитес çулсенче “Ылтăн шайба” призĕшĕн тата ытти хоккей ăмăртăвĕсене ытларах команда хутшăнасса шанас килет.

Пĕрлех çакна та асăнса хăварар: кăçалхи февралĕн 17-мĕшĕнче Г.С. Хаймулина асăнса йăлана кĕнĕ уçă хоккей турнирĕ иртет. Унта Шупашкар тата ытти хăш-пĕр районсен командисем хутшăнма кăмăл тунă. Ăмăртусене хутшăнма тата болельщиксене курма пыма йыхравлатпăр.