Публикации » Спорт уявĕ массăлăхпа палăрчĕ

Çак вăхăтра районта пурăнакан спортсменсем пушă вăхăтра йĕлтĕрсем çине тăрса вăрмана çул тытаççĕ, тĕрлĕ ăмăртусене хаваспа хутшăнаççĕ.

Иртнĕ вырсарни кун Тăвай енре те “Раççей йĕлтĕр йĕрĕ–2013” мероприяти йĕркелерĕç. Кăнтăрла çитеспе ачасемпе çамрăксен спорт шкулĕн территорине сывă пурнăçшăн тăрăшакан пур ÿсĕмри çынсем те пухăнчĕç.

Спорта юратакансене, командăсене хавхалантарма тухнисене район администрацийĕн пуçлăхĕ Владимир Ванерке саламларĕ, чупура малти вырăнсене тухма сĕнчĕ пурне те. ЧР физкультурăпа спорт тата туризм министрĕн çумĕ Алексей Яковлев, педагогика ĕçĕн ветеранĕ, физкультурăна юратакан Борис Мурзин ăшă сăмах каларĕç, пурне те çĕнтерÿ патне ăнтăлма хавхалантарчĕç.

Чи малтан старта районти ача садне çÿрекенсем тухрĕç. 100 метрлă дистанцие парăнтарассишĕн пĕтĕм вăйне пухса чупрĕç пĕчĕкскерсем.

Çитес çулхи Сочире пулакан олимпиадăна халалласа, VIP-чупуна хутшăнакансем 2014 метра чупрĕç. Владимир Лукинпа Елена Скворцова çĕнтерÿçĕсем пулса тăчĕç кунта.

Кашни ушкăнри малти виçĕ вырăна тухнисене медальсем, дипломсем тата асăнмалăх парнесем "”Раççейри йĕлтĕр йĕрĕ – 2013” тесе çырнă шурă калпаксем" пачĕç. Дистанцие тухнисене – Тăвай район символлĕ брелоксем.

”Раççейри йĕлтĕр йĕрĕ – 2013” районта пурăнакансемшĕн чăн-чăн уяв пулчĕ. Вăйлă çил те спортсменсен савăнăçне сÿрĕклетеймерĕ. Сывă пурнăçшăн тăрăшакансем, пĕр-пĕринпе канашласа, малашне тата пысăкрах ÿсĕмсем тума тĕллев тытса саланчĕç уявран.