Публикации » Республика шайĕнчи фестивальте

Районта республика шайĕнчи “Уçă хими урокĕ” методика фестивалĕ иртрĕ. Ăна Чăваш Республикин Вĕрентÿ институчĕ кăçал 2-мĕш хут йĕркелет (пĕрремĕшĕ Элĕк районĕнче иртнĕ). Çакăн евĕр фестиваль творчествăлла ĕçлекен учительсене палăртма, вĕсен опытне ыттисем хушшинче сарма, тĕрлĕ вĕренÿ заведенийĕсем хушшинчи çыхăнăва çирĕплетме пулăшать.

Тĕп мероприятисем Тăвайри вăтам шкулта иртрĕç. Вĕсене уçнă çĕре район администрацийĕн пуçлăхĕ В.Ванерке, вĕрентÿ пайĕн ертÿçин тивĕçĕсене вăхăтлăха пурнăçлакан И.Семенова, шкул директорĕ В.Кириллова, ЧР Вĕренÿ институчĕн методисчĕ М.Николаева хутшăннă.

Конкурсра 64 педагог пулнă, 48 урок панă. Конкурс мероприятийĕсем çавăн пекех Тушкил, Элпуç шкулĕсенче те иртнĕ. Уроксене интереслĕ те пысăк ăсталăхпа йĕркеленине палăртнă.

Çĕнтерÿçĕсене 6 номинаципе палăртнă: “Классикăлла урок”, “Чи лайăх презентациллĕ урок”, “Вĕрентекен-ăста”, “Хими урокĕсене кăмăлланăран”, “Урока тĕрлĕ меслетсемпе йĕркелени”, “Педагогика шанчăкĕ”. Палăртса хăврмалла, районти вĕрентекенсем урокĕсене тивĕçлĕ шайра ирттернĕ. Н.Гаврилова (Тăвай шкулĕ) “Вĕрентекен-ăста” номинацире çĕнтерÿçĕ ятне илнĕ. Çавăн пекех Л.Ванерке (Енĕш Нăрваш шкулĕ), Т.Большова (Тĕмер), Н.Козлова (Элпуç) тĕрлĕ номинацисенче лауреат пулса тăнă. Конкурс-уроксем хыççăн вĕрентекенсем шкул ачисен ăсталăхне пăхса киленнĕ. Тăвай шкулĕнчи директорăн воспитани енĕпе ĕçлекен çумĕ Н.Михайлова ертсе пынипе хатĕрленĕ концерт пурин кăмăлне те кайнă.

Конкурса хутшăнакансен чи лайăх урокĕсене “Хими вĕрентекенĕсен опытне пĕтĕмлетни” сборникра пичетлеме палăртнă.