Публикации » Кĕрешÿ çивĕчленет

Район центрĕнчи физкультура коллективĕсем хушшинчи волейбол турнирĕ финишалла çывхарать. Çавна май кĕрешÿ тата ытларах çивĕчленет.

Акă тунти кунхи тĕл пулăва ял хуçалăх предприятийĕсемпе фермер хуçалăхĕсен ертÿçисен ку таранччен пĕр çухатусăр пынă команди чутах ДЮСШ волейболисчĕсенчен çухату тÿсмерĕ. Ертÿçĕсен командинче ку хутĕнче А.Алексеев çукки вăйлă палăрчĕ. Çамрăк волейболистсене хальлĕхе опыт çителĕксĕрри, кашни мечĕкшĕн вĕçне çитиччен хавхаланса кĕрешме пултарайманни такăнтарать.

“Янтиково” волейбол клубĕ “Дорстрой” командинчен 1-мĕш çаврăмри çухатушăн реванш илме тĕплĕн хатĕрленнĕ. Тĕрĕссипе, тĕл пулу çăмăл мар иртессе икĕ енĕ те пĕлнĕ. Волейбол клубĕ командăна А.Шараповпа тата В.Цыгановпа, “Дорстрой” А.Михайловпа тĕреклетнĕ. Л.Леонтьев (аманнă пирки хăй вылямасть) команди ку хутĕнче пуçтарăнарах, пысăкрах хавхаланупа вылярĕ, “Дорстройран” 2:1 шутпа выляса илчĕ. “Дорстройăн”, йышра ăста волейболистсем пур пулин те, вăйă каймарĕ. Вăййа хăй çине илсе, ыттисене хыççăн чĕнекен, хавхалану кÿрекен лидер палăрмарĕ.

Юн кун тепĕр татса паракан тĕл пулу пулчĕ. «Дорстрой» волейболисчĕсем вĕрентÿ пайĕн командине 2:1 шутпа çĕнтерчĕç.