29 мая 2014 г.
Тырăпа çĕр улми туса илесси тĕп ĕçсем пулса тăраççĕ Вăрманхĕрринчи Сергей Михайлов хресчен фермер хуçалăхĕнче. "Халĕ çурхи тĕш тырă культурисене çум курăкран хỹтĕлесе гербицид сапатпăр. Вĕсем пурĕ 197 гектар. Калчасем аван. Ку вăхăт тĕлне 70 гектарне сапрăмăр. Агрегатпа Виталий Николаев механизатор ĕçлет", - терĕ Сергей Николаевич.
Тырăсăр пуçне çĕр улми 35 тата нумай çул ỹсекен курăксем 23 гектар йышăнаççĕ. Кĕçех çĕр улмине те пăхса тăма тытăнаççĕ. Утçи те çывхарать.
Хальхи вăхăтра тепĕр хĕрỹ ĕçе те пикеннĕ фермер: кивĕ сысна витисене реконструкцилесе, çĕр улми хранилищи тума тытăннă. Пĕчĕкех пулмĕ унăн усăллă лаптăкĕ. Машинăсемпе кĕрсе тухмалла çĕнетсе хатĕрлеççĕ.