27 января 2014 г.
Çак эрнере Ленин орденĕн кавалерĕ, районти паллă механизатор, комбайнер, Вăрманхĕрринче пурăнакан Петр Николаевич Николаев 90 çул тултарчĕ. Мăшăрĕпе иккĕшĕ 3 хĕр те 1 ывăл пăхса çитĕнтернĕ. Клавдия Михайловна апрельте паллă тăвать хăйĕн çуралнă кунне, вăл 86 çул тултарать. Туслă мăшăр 67 çул пĕрле алла-аллăн тытăнса утать пурнăç çулĕпе.
Ытлари кун ĕç ветеранне паллă юбилейпе район администрацийĕн пуçлăхĕ Владимир Ванерке, ĕçпе вăрçă ветеранĕсен районти канашĕн председателĕ Римма Гурина, Тăвай ял тăрăхĕн пуçлăхĕн çумĕ Юлия Королева киле пырса ăшшăн саламланă, ырлăх-сывлăх, вăрăм кун-çул суннă, парне панă. Юбиляр патне çавăн пекех РФ Президенчĕн Владимир Путинăн саламлă сăмахĕсене çитернĕ.