Публикации » Пуçаруçă та, йĕркелÿçĕ те, спортсмен та

Иртнĕ эрнере “Аль” спорткомплексри бассейнра ишсе Тăвай ял тăрăхĕнче мала тухассишĕн эстафета ăмăртăвĕсем пулчĕç.

Спортсменсене район администрацийĕн пуçлăхĕн тивĕçĕсене пурнăçлакан В.Ванерке, Тăвай ял тăрăхĕн пуçлăхĕ Н.Васильев, ăмăртусен йĕркелÿçи Э.Буинцев саламласа ăнăçусем сунчĕç. Çитĕннисемпе шкул ачисем Э.Буинцев парнисемшĕн тупăшрĕç.

Ăмăртусене унăн пуçаруçи хăй те хутшăнчĕ. Çитĕннисем хушшинче РТП команди 1-мĕш вырăн йышăнчĕ, унăн чысне Э.Буинцевпа пĕрле С.Степанов, Е.Федоров тата И.Новиков хÿтĕлерĕç. Райцентр çамрăкĕсем 2–3 вырăнсене тухрĕç. Çамрăк ишевçĕсем хушшинче те РТПрисем – К.Николаев, И.Новиков, А.Петров, С.Сучков – пьедесталăн çÿлти картлашки çине тăма тивĕçрĕç. Малти вырăн йышăннă командăсене дипломсемпе медальсем, çĕнтерÿçĕсене Тăвай ял тăрăхĕн администрацийĕн куçса çÿрекен кубокĕсемпе наградăларĕç.

Калас пулать, Буинцевсен çемйинче арçынсем пурте спортпа туслă. Çемье пуçĕ Юрий Александрович нумай çул кире пуканĕ çĕкленĕ, çуран та, йĕлтĕрпе те чупнă. Ачисемшĕн ырă наставник шутланать. Ывăлĕ Эдуард Юрьевич спортпа шкул çулĕчченех туслашнă. Кире пуканĕ çĕклеме те, волейболла, футболла, баскетболла выляма та, сĕтел çи теннисра та ăста вăл. Тĕрлĕ енлĕ аталаннă çамрăк. Хăйшĕн кăна мар, спорта аталантарассишĕн нумай вăй хурать. Вăл чупмасăр-йĕркелемесĕр мар, “Дорстрой” футболисчĕсем кăçал район чемпионĕсем пулса тăчĕç. Волейболистсем те коллектив чысне çÿлте тытаççĕ. Э.Буинцев пуçарăвĕпе иртнĕ çул РТП территорийĕнче мини-стадион турĕç, пушă вырăна бульдозерпа тикĕслесех, йĕри-тавра карта тытсах. Халĕ кунта турник çинче туртăнма та, волейболла, футболла выляма та пулать. Çак кунсенче площадкăна каçхи вăхăтра çутатмалла турĕç. Эдуард Юрьевич ачасене ярăнма каток туса парасшăн. Акă “Акконд–агро фирма” хĕл вĕçнелле йĕлтĕрçĕсен ăмăртăвне йĕркелет. Ватти-вĕтти таранах хутшăнать вĕсене. Каллех Эдуард Буинцев тăрăшнипе. Физкультурăпа спорта ун пек чунтан парăннă, пуçаруллă çынсем ытларахчĕ пире. Çавăн чухне сывă пурнăç йĕрки хăех нумай-нумай çыншăн кулленхи норма пулса тăрĕ.

Спортпа туслă пулнисĕр пуçне çамрăк иккĕмĕш аслă пĕлÿ илет. МАДИн Шупашкарти филиалĕнче юлашки курсра вĕренет. Çавăн пек тĕллевлĕ çамрăк Эдуард Буинцев.