Публикации » Комплексра пăру вити çĕкленет

“Акконд–агро фирма” акционерсен хупă обществи иртнĕ уйăхра ĕне выльăх ĕрчетмелли комплекс территорийĕнче 308 пуç пăру вырнаçмалли вите тăвас ĕçе пуçăнчĕ.

Ĕçе “СКАТ–2000” тулли мар яваплăхлă общество (Шупашкартан) пурнăçлать. Хальхи вăхăтра 2 бригада ĕçлет, кашнине кранпа тивĕçтернĕ, бульдозер, экскаватор пур. Строительсем никĕс вырнаçтарса тухнă, вите çивиттине çĕклеме металл колоннăсем (40) çирĕплетсе лартнă. Вите тăррине ăшă тытмалла тăваççĕ, сэндвич панельсемпе витеççĕ. Стенасене керамзитран хатĕрленĕ панельсемпе хăпартаççĕ. Чÿречесем – пластикран. Вите айĕнче шыв пухăнса тăрассинчен сыхланса пăрăхсенчен дренаж системи хурса хăвараççĕ. Ĕçсене кунти выльăх-чĕрлĕх комплексне тума хутшăннă В.Александров прораб йĕркелесе пырать.