12 мая 2012 г.
Аслă Çĕнтерỹ кунĕ Елчĕкре футболистсен тата çăмăл атлетсен ăмăртăвĕсем иртрĕç. Футболла выляса район кубокне çĕнсе илессишĕн турнирăн финалĕ йăлана кĕнĕ йĕркепе çак кун иртет. Кăçал финалта Елчĕк тата Тăрăм ял тăрăхĕсен командисем тĕл пулчĕç. Финала тухиччен Елчĕксем çурма финалта Аслă Елчĕк командинчен 7:0 шутпа, Тăрăмсем Çирĕклĕ Шăхаль ял тăрăхĕнчи футболистсенчен 5:3 шутпа выляса илнĕ. Финалти ăмăртура Елчĕксем вăйлăрах, пултаруллăрах пулни пĕрремĕш тайм пуçламăшĕнчех палăрчĕ. Вĕсем тапăнса вылярĕç, хăнасен хапхи умĕнче гол тапса кĕртмелли самантсем кăларса тăратрĕç. Анчах тĕл пулăвăн пĕрремĕш çурринче Тăрăмсен хапхине пĕр мечĕк çеç кĕртме пултарчĕç. Ăна В.Ишмуратов кĕртрĕ. Иккĕмĕш таймра вăйă йĕрки улшăнмарĕ. Елчĕк ял тăрăхĕн командинчи А.Ишмуратов, С.Васильев, О.Борисов, Г.Смирнов футболистсем хăнасен хапхине тата 4 мечĕк тапса кĕртме пултарчĕç. Çапла вара Елчĕк районĕн куçса çỹрекен кубокĕ кăçал та район центрĕнчех юлчĕ.
Источник: "Елчĕк Ен"