Публикации » Çар институчĕн курсанчĕ

19 июня 2010 г.

        Елчĕкре пурăнакан Галина Витальевнăпа Виталий Георгиевич Черновсем икĕ ывăл çитĕнтернĕ. Ытти чылай ашшĕ-амăшĕ пекех тĕпренчĕкĕсене тивĕçлĕ воспитани парса ỹстерсе çĕр-шыва юрăхлă çынсем пулччăр тесе тăрăшнă вĕсем. Çак кунсенче Черновсем Павел ывăлĕ вĕренекен Раççей ШĔМĕн шалти çарĕсен Саратоври çар институтĕнчен Тав çырăвĕ илчĕç. Курсантсен 4-мĕш батальонĕн командирĕ А.Полторецкий Павел Черновăн ашшĕ-амăшне ырă, çĕр-шыва юрăхлă тĕреклĕ ывăл çитĕнтернĕшĕн тав сăмахĕ каланă, асăннă институтра 3-мĕш курсра пĕлỹ илекен Павел хăйне лайăх енчен çеç кăтартнине, юлташĕсемпе командирсен хушшинче пысăк хисепре пулнине палăртнă. Черновсен тепĕр ывăлĕ те ашшĕ-амăшĕн савăнăçĕ. Шкул хыççăн И.Я.Яковлев ячĕллĕ Чăваш патшалăх педагогика университетне вĕренме кĕнĕ вăл, информатикăпа педагогика учителĕн специальноçне алла илнĕ. Институтран вĕренсе тухнă хыççăн тăрăшуллă та ăста специалиста преподавательсем университетрах ĕçлеме юлма сĕннĕ. Çулталăка яхăн Алексей хăй вĕреннĕ университетра инженер-программистра вăй хурать.

Источник: "Елчĕк Ен"