Публикации » Илем куçа илĕртет

Районти вĕренỹ учрежденийĕсем Вĕрентекен çулталăкне халалланă курав халăха хăй патне илĕртекен тепĕр вырăн пулчĕ. Курава тăратнă ĕçсемпе паллашнă май нумайăшĕ тĕлĕнĕвне пытармарĕ. Мĕн тери пысăк фантази тата тăрăшулăх кирлĕ çак япаласене хатĕрлеме. Елчĕкри искусство шкулĕн вĕренекенĕсемпе вĕрентекенĕсем (ертỹçи Р.Парферьева) хатĕрленĕ япаласем куракансене уйрăмах кăсăклантарчĕç. Чăваш тумĕсемлĕ хитре пуканесемпе чылайăшĕ асăнмалăх сăн ỹкерĕнчĕ. Асăннă шкулăн вĕренекенĕсем хăйсен ăсталăхĕпе район шайĕнчи конкурссенче анчах мар, республикăра та палăраççĕ, час-часах призлă вырăнсене çĕнсе илеççĕ. Конкурс комиссийĕн членĕсем вĕсен ĕçĕсене хальхинче те чи лайăххи тесе хакларĕç. Çуткỹлсем вĕтĕ шăрçаран тĕрлĕ капăрлăх хатĕрĕсем ăсталас енĕпе маçтăр: тухья, мăй çыххи, кăкăр умĕ, тенкĕ... Курава тĕрленĕ салфеткăсем те чылай тăратнă. Шкулти Е.Корнилова вĕрентекен ачасене мĕн пĕчĕкренех илемлĕх тĕнчине туйма хăнăхтарать. Унăн вĕренекенĕсен ĕçĕсенчен час-часах тĕрлĕ куравсем йĕркелеççĕ. Патреккелсене Н.Иванов вĕрентекен йывăçран тĕрлĕ илемлĕх хатĕрĕсем ăсталама вĕрентсе пырать, ĕç урокĕсенче усă курма туяннă çĕнĕ станоксем ĕçе тата та çăмăллатаççĕ. Ачасене пысăк ăсталăха хăнăхтарса пыракан Елчĕк шкулĕнчи В.Долгов, Кушкăри С.Голубева, Кĕçĕн Таяпари А.Ивановăпа А.Маркова, Çирĕклĕ Шăхалĕнчи Т.Пежирова, Яманчỹрелĕнчи В.Комиссарова, Тĕмерти Л.Краснова, Çĕнĕ Пăвари Г.Васильев, Лаш Таяпари П.Теренин, Таяпа Энтринчи Р.Никитина тата ытти вĕрентекенсем те ырă ята тивĕç. Курава тăратнă япаласене туянас текенсем тупăнсах тăчĕç уявра.