20 февраля 2010 г.
Район сучĕпе районти 1-мĕш номерлĕ миравай суд участокĕ çак кунсенче 2009 çулхи ĕç-хĕле пĕтĕмлетсе канашлу ирттерчĕç. Ăна район сучĕн председателĕ С.Кузнецова ертсе пычĕ. Суд тытăмĕ наци экономикине аталантарассинче, гражданла обществăна йĕркелессинче паллă та курăмлă вырăн йышăнать. Федерацин "Раççей суд тытăмĕн аталанăвĕ" тĕллевлĕ программи юлашки çулсенче суд ĕç-хĕлне чылай улшăну кĕртнĕ. Çак программа суд ĕçне уççăн та уçăмлă йĕркелеме, унăн общество умĕнчи яваплăхне тата та ỹстерме, ĕçсене эффективлă пăхса тухма май панине асăнчĕ Светлана Алексеевна. Район судне паянхи кун тĕрлĕ вырăнта пурăнакан кирек хăш çын та электронлă почта урлă хăйĕн сĕнĕвне ярса пама, ыйтусем çине хурав илме, судăн сайтне кĕрсе унăн ĕç-хĕлĕпе тата йĕркипе, пăхса тухнă е итлеме палăртнă ĕçсемпе паллашма пултарать. Канашлура суд ĕçченĕсем уголовлă, гражданла, административлă ĕçсене тишкерчĕç. Иртнĕ çул район сучĕ 44 уголовлă ĕç пăхса тухса вĕçленĕ (2008 çулхипе танлаштарсан 17 ĕç сахалрах), преступлени çулĕ çине тăнă 43 çын тĕлĕшпе тивĕçлĕ айăплав тăратнă. Пĕлтĕр айăпçăсем суд йышăнăвĕпе килĕшмесĕр 7 ĕçе пăрахăçлама ыйтса хирĕçлев çырнă пулсан, вĕсенчен 1 ĕçне анчах улăштарнă. Район сучĕн йышăнăвĕсене çирĕплетеслĕх 2008 çулта 100 процентпа танлашнă пулсан, иртнĕ çул вăл 97,7 процентпа (республика шайĕнче 95,2 процент) танлашнă. Уголовлă ĕçсене саккунра палăртнипе килĕшỹллĕн вăхăтлă тата пахалăхлă пăхса тухнă, йĕркене пăснă тĕслĕхсем пулман. Лару-тăрăва тишкерсе хакланă май уголовлă ĕçсемпе район сучĕ айăпа кĕнисен 37,5 процентне (15 çын) ирĕкрен хăтарнă, 7,5 процентне (3) обязательнăй майпа ĕçлеме янă, 27,5 процентне (11) штрафланă, 5 çынна палăртнă должноçсене йышăнма тата палăртнă ĕçпе ĕçлеме чарнă. Судпа айăпланнисен хушшинче çул çитмен 1 ача. Юлашки çулсенче суд сакки çине ларакан хĕрарăмсен шучĕ ỹссех пыни те пăшăрхантармасăр тăмасть. 2008 çулта вĕсен шучĕ тăваттăпа танлашнă пулсан, 2009 çулта вĕсем вун пĕрĕн. Преступлени çулĕ çине тăнисенчен 23-шĕ ниçта та вĕренмен е ĕçлемен, 8-шĕ маларах та судпа айăпланнă пулнă, 7-шĕ преступление ушкăнпа тунă. Уголовлă ĕçсен шутĕнче 18-шĕ харпăрлăха, 10-шĕ теприн пурнăçĕпе сывлăхĕшĕн хирĕçле, 2-шĕ патшалăх влаçне, патшалăх тата вырăнти хăй тытăмлăх службисен интересĕсене, 3-шĕ коммерци тата ытти организацие хирĕçле, 3-шĕ экономикăри, 5-шĕ çул-йĕр çинчи хăрушсăрлăхпа тата транспорт хатĕрĕпе усă курассипе çыхăннă, 2-шĕ ытти тĕрлĕ преступленисем. 12 уйăхра граждансен 310 ĕçне пăхса тухнă. Çав шутран 306-шне вĕçленĕ, 259 ĕç тĕлĕшĕпе йышăну кăларнă. Миравай суд участокĕн ĕç калăпăшĕ пысăккине те палăртрĕ С.Кузнецова. Район судĕнче уйăха 1,5 ĕç пăхса тухнă пулсан, миравай судра ĕçсем палăрмаллах нумай. Кунта уйăха 8,5 ытла ĕç пăхса тухнă. Канашлура 1-мĕш номерлĕ миравай суд участокĕн миравай судйи Т.Матвеева тухса калаçрĕ, иртнĕ çулхи ĕç-хĕлпе паллаштарчĕ. Кунта 2009 çулта 89 уголовлă ĕç пăхса тухса вĕçленĕ, çавна май 69 çынна уголовлă майпа явап тыттарнă. Суд йышăнăвне çирĕплетеслĕх 98, 6 процентпа (республика шайĕнче _ 96,6 процент) танлашнă. Миравай суд участокĕ преступлени çулĕ çине тăнисенчен ытларах пайне _ 30 çынна _ "обязательнăй айăплав" парса хăварнă, 4-шне ирĕкрен хăтарнă, 22-шне условлă майпа айăпланă, 12-шне штрафланă, 1 çынна ĕçлесе юсанма йышăну кăларнă. Административлă ĕçсене илес пулсан пурĕ 459 ĕç пăхса тухнă. 426 ĕçпе тĕрлĕ айăплав тăратнă. Çав шутран 1 предприятие, должноçри 161 çынна, 264 уйрăм çынна административлă майпа явап тыттарнă. 44 çынна административлă майпа арестленĕ, 3 çынна палăртнă ĕçе юрăхсăр тесе йышăннă, 264-шне тĕрлĕ правăран хăтарнă.
Источник: "Елчĕк Ен"