19 апреля 2017 г.
Йăлана кĕнĕ тăрăх, районта спорт сезонĕ уçăлнă ятпа «Елчĕк ен» хаçат призĕсемшĕн çăмăл атлетсен çуркуннехи кросĕ 39-мĕш хут иртрĕ.
Çуллахи спорт сезонĕ уçăлнă ятпа район администрацийĕн пуçлăхĕн пĕрремĕш çумĕ Леонард Левый, «Елчĕк ен» хаçатăн тĕп редакторĕ Николай Алексеев саламларĕç, ăнăçу сунчĕç. 39 çул хушшинче çăмăл атлетсен çурхи кросĕ хăйĕн адресне чылай улăштарнă: Елчĕк-Аслă Елчĕк çулĕ, аэродром территорийĕ, Елчĕкри пасар патĕнчен халăха ĕçпе тивĕçтерекен центр патне каякан çул тата ытти те... Кăçал çурхи кросс Елчĕкри тĕп стадионта иртрĕ. Çанталăк савăнтарсах каймарĕ пулин те, ăмăрту çивĕч пулчĕ - кашни çăмăл атлет мала тухма тăрăшрĕ, хăйĕн пултарулăхĕпе савăнтарчĕ. Хамăр районти спортсменсемсĕр пуçне кÿршĕ Тутарстанри Пăва районĕнчи Лашчăпуçĕнчи атлетсем те ăмăртăва хутшăнма кăмăл тунă. Кунта шкулти физкультурăна вĕрентекен, хамăр ентеш Сергей Смирнов палăртнă тăрăх, 8 çăмăл атлет ăмăртăва хутшăнчĕ. 54 ача вĕренекен шкулшăн çакă начар мар.
Çăмăл атлетсен çурхи кросне хутшăнакансем хушшинче иртнĕ çулсенче палăрнă спортсменсем сахал мар. Анастасия Антонова, Анастасия Удалова, Владимир Кузьмин, Анастасия Гладкова, Борис Головин. Вĕсемпе пĕрлех спортăн аслă тÿпине Антон Гаврилов, Юлия Краснова, Александр Афанасьев, Дмитрий Скобелев, Мария Павлова, Лариса Гладкова, Алексей Васильев ăнтăлаççĕ. Малашне те вĕсене ăнăçу пултăр!
Кашни çулах çăмăл атлетсен çурхи кросне чи çамрăккисем хутшăнни те кăмăла уçать. Акă, Кĕçĕн Таяпари пĕтĕмĕшле вăтам пĕлÿ паракан тĕп шкулти виççĕмĕш класра пĕлÿ пухакан Руслан Орловпа Аня Шепилова, çавăн пекех Шăмалакри тĕп шкулти Дмитрий Рахмуллин та чыса тивĕç. Çамрăк пулсан та, вĕсем çăмăл атлетсен тупăшăвне тухма шикленсе тăман.
Ăмăрту хĕрÿ иртнĕ пулин те, юлашки çулсенче хăш-пĕр ял тăрăхĕсем, предприятисемпе организацисен командисем курăнманни палăрать. Нивушлĕ пирĕн Елчĕк тăрăхĕнче пултаруллă çăмăл атлетсен йышĕ чакса пырать? Аса илер-ха, «Елчĕк ен» /маларах «Колхоз ялавĕ»/ хаçатăн çурхи кросĕнче Олимп вăййисен бронза призерĕ Владимир Андреев /Лаш Таяпа/, çĕршыв чемпионĕ, Пĕтĕм тĕнчери ăмăртусен çĕнтерÿçи Александр Васильев, ытти паллă спортсменсем вăй виçнĕ, мала тухнă. Вĕсен ырă тĕслĕхĕ пирĕн асăмăрта юлмаллах!
«Елчĕк ен» хаçат редакцийĕ çăмăл атлетсен çурхи кросне йĕркелесе ирттерсе яма пулăшнă районти ачасемпе çамрăксен спорт шкулĕн коллективне, шкулсенчи физкультура предметне вĕрентекенсене, тĕп больницăри Марина Мазюкина медсестрана тата ыттисене тав тăвать.
Вĕсем - çĕнтерÿçĕсем
2006 çулта çуралнă тата çамрăкрах хĕрачасем. 500 м.: 1. Анастасия Антонова /Патреккел/. 2. София Ловкина /Хăвăлçырма/. 3. Олеся Мекшеева /Кушкă/. 2006 çулта çуралнă тата çамрăкрах арçын ачасем. 500 м.: 1. Антон Гаврилов /Кивĕ Эйпеç/. 2. Павел Антонов /Патреккел/. 3. Олег Ефимов /Аслă Елчĕк/. 2004-2005 çулсенче çуралнă хĕрачасем. 500 м.: 1. Юлия Краснова /Таяпа Энтри/. 2. Анна Лалаян /Аслă Елчĕк/. 3. Кристина Федорова /Лаш Таяпа/. 2004-2005 çулсенче çуралнă арçын ачасем. 1000 м.: 1. Александр Афанасьев /Курнавăш/. 2. Кирилл Кузнецов /Аслă Таяпа/. 3. Дмитрий Жуков /Тĕмер/. 2002-2003 çулсенче çуралнă хĕрачасем. 1000 м.: 1. Анастасия Удалова /Хăвăлçырма/. 2. Анастасия Демьянова /Курнавăш/. 3. Алиса Казанова /Патреккел/. 2002-2003 çулсенче çуралнă арçын ачасем. 2000 м.: 1. Дмитрий Скобелев /Кĕçĕн Таяпа/. 2. Андрей Ефимов /Курнавăш/. 3. Владимир Фадеев /Лаш Таяпа/. 1999-2001 çулсенче çуралнă хĕрсем. 2000 м.: 1. Анастасия Гладкова /Курнавăш/. 2. Наталия Федорова /Çирĕклĕ Шăхаль/ 3. Елена Перепелкина /Хăвăлçырма/. 1999-2001 çулсенче çуралнă каччăсем. 3000 м.: 1. Владимир Кузьмин /Хăвăлçырма/. 2. Георгий Агеев /Аслă Елчĕк/. 3. Максим Петров /Елчĕк/. 35 çула çитмен хĕрарăмсем. 1000 м.: 1. Мария Павлова /Курнавăш/. 2. Анастасия Степанова /Шăмалак/. 3. Елена Филимонова /район администрацийĕ/. 40 çула çитмен арçынсем. 2000 м.: 1. Алексей Васильев /Елчĕк ял тăрăхĕ/. 2. Дмитрий Алексеев /Çирĕклĕ Шăхаль/. 3. Андрей Колбасов /Кĕçĕн Таяпа/. Хĕрарăм ветерансем. 500 м.: 1. Лариса Гладкова /Курнавăш/. 2. Надежда Головина /Кĕçĕн Таяпа/. 3. Лариса Ильина /Кĕçĕн Таяпа/. Арçын ветерансем. 1000 м.: 1. Борис Головин /Кĕçĕн Таяпа/. 2. Сергей Горшков /Аслă Елчĕк/. 3. Петр Смирнов /район администрацийĕ/. Командăсем. Пĕтĕмĕшле пĕлÿ паракан вăтам шкулсем. 1. Курнавăш. 2. Елчĕк. 3. Лаш Таяпа. Тĕп шкулсем. 1. Хăвăлçырма. 2. Патреккел. 3. Таяпа Энтри. Предприятисемпе организацисем. 1. Курнавăш ял тăрăхĕ. 2. Кĕçĕн Таяпа ял тăрăхĕ. 3. Район администрацийĕ.
А.КАРЛИН.
Сăнÿкерчĕкре: çĕнтерÿçĕсем - Курнавăшри пĕтĕмĕшле пĕлÿ паракан вăтам шкул команди.
Источник: "Елчĕк Ен"