Публикации » Ял çынни хĕрÿ ĕçре

29 апреля 2017 г.

Çакăн пекки сайра пулать: ака уйăхĕн иккĕмĕш вунăкунлăхĕнче тепĕр хут «хĕл ларнăран» - юр çуса тултарнăран акана тухас ĕçре  вăхăтлăх чăрмавсем пулчĕç пулин те хальхи вăхăтра районти ялхуçалăх предприятийĕсен   уй-хирсенчи ĕç шавĕ куллен вăй илсе пырать.

Район администрацийĕн пуçлăхĕ Николай Миллин кĕçнерникун пĕрчĕллĕ тата пăрçа йышши культурăсене чи малтисенчен пĕри акма тухнă «АСК-Яльчики» ОООра пулса курчĕ. Çĕнĕ  йышши, технологи ыйтнине туллин тивĕçтерекен техникăсемпе пуян ялхуçалăх предприятийĕнчи ĕç-хĕлпе паллашма питех те кăсăклă. «Амазония» йышши агрегатсемпе усă курни  кашни ĕçе - анасем çине минераллă удобрени хывассипе тĕш тырра акассине тата лаптăксене акнă хыççăн пусăрăнтарассине вĕçе-вĕçĕн йĕркелесе пыма май парать. Çакна кура ĕç тухăçлăхĕ те пысăк.

Эрнекун «Комбайн» ялхуçалăх производство кооперативĕн тата «Нива» агрофирма» ОООн уй-хирĕсенче те тыр-пул акас ĕçе анлăн пуçарса ячĕç. Пуçламăшĕ ăнăçлă, механизаторсем малашнехи ĕç те кал-кал пулса пырасса шанаççĕ.

 Район ертÿçисем ĕнер çавăн пекех  «Победа» ООО, «Рассвет», «Сатурн», «Колос» ЯХПКсен, «Клевер» ООО, «Кушка» ЯХПК, «Энтепе» ООО уй-хирĕсемпе техника паркĕсенче те пулса курчĕç. Механизаторсемпе тĕл пулчĕç, вĕсен ĕç условийĕсемпе паллашрĕç. Вĕсенче те паян-ыранах акана тухаççĕ.

- Çурхи кун çулталăк тăрантарать тесе ахальтен каламаççĕ. Кашни самантпа тухăçлă усă курса юлма ĕлкĕресчĕ, кая юлас марччĕ, - тет район администрацийĕн пуçлăхĕ Николай Миллин.

Е.ИГНАТЬЕВА сăнÿкерчĕкĕнче: «АСК-Яльчики» ООО уй-хирĕнче.

Источник: "Елчĕк Ен"