Публикации » Аннесене халалланă уяв

Чỹк уйăхĕн 22-мĕшĕнче Елчĕкри культурăпа кану центрĕнче "Анне пулма пỹрнĕ хĕрарăм" ятпа уяв иртнĕ. Уява хутшăннисем чи малтанах ачасен ỹкерчĕкĕсенчен йĕркеленĕ куравпа паллашнă. Кашни ачах хăйне чун парнеленĕ çывăх çыннин сăнне юратса тата савса тĕрлĕ майпа хут çине куçарса пама тăрăшни уява хутшăннисен кăмăлĕсене çĕкленĕ. Аннесене халалланă уява Елчĕк район администрацийĕн пуçлăхĕ Н.Миллин уçнă. "Анне" ята илтнĕ кашни хĕрарăмах чун-чĕререн саламласа ырлăх-сывлăх, ăнăçусемпе çитĕнỹсем суннă май Николай Петрович икĕ е унран та ытларах ачана пурнăç парнеленĕ çемьесене Раççей Федерацийĕн тата Чăваш Республикин Правительствисем уйăракан амăшĕн капиталĕпе усă курма ирĕк паракан сертификачĕсемпе чысланă. Хальхинче вĕсене Светланăпа Василий Петровсем (Çирĕклĕ Шăхаль), Зинаидăпа Николай Микихинсем (Курнавăш), Алинăпа Федор Теллинсем (Кавал), Николайпа Наталья Горшковсем (Аслă Елчĕк) тивĕçнĕ. Салам сăмахĕсем çумне районти хĕрарăмсен канашĕн председателĕ Е.Михайлова хутшăннă. Елчĕк шкулĕнче вĕренекенсем, Елчĕкри искусство шкулĕн воспитанникĕсем, "Солнышко" тата "Чебурашка" ача сачĕсене çỹрекенсем, Елчĕкри культурăпа кану центрĕн артисчĕсем пуçтарăннисене хаваслă юрă-ташăпа савăнтарнă. Сăн ỹкерчĕкре: Раççей Федерацийĕ тата Чăваш Республики уйăракан Амăшĕн капиталне тивĕçнĕ Светланăпа Василий Петровсем Александр ывăлĕпе пĕрле.